“SUAP” ARI TAIB – ENDA KELALU LAUN?
Nitih ke sebengkah report dalam suratkhabar The Borneo Post empai lama tu udah, Taib enggau raban BN iya nguji deka ngambi ati bala pengundi ba Pulai Beruit enggau jako-jako semaia deka nganjong ‘pemansang’ ngagai endor nya. Kurang lebih seminggu ti udah kami udah ngayan ke berita pasal baka ni Kepala Menteri enggau sida sebilik udah bulih penguntong berjuta-juta ringgit ari pengawa ngerumpak tanah NCR enggi raban bansa Melanau. Dalam pansik kami nya, kami ngayan ke baka ni Kepala Menteri ngena kuasa iya meri lessen ladang sawit ti mungkor lebih setengah ari pemesai pulau nya, lalu diserah ke iya suh dua iko menyadi iya enggau rega ti murah amat. Udah lepas 12 hari seduai bulih lesen ari perintah nya (terima kasih suh Taib), seduai iya lalu nyual konsesi tanah nya kena ngulih ke untong RM40 juta ringgit!
Kami bisi mega ngayan ke berita baka ni Kepala Menteri nya nyerah ke laloh setengah da agi ari pulau nya ngagai kompeni Delta Padi, ti endor iya empu megai maioh agi share. Iya enggau bala menyadi iya mengkang megai share ba kompeni-kompeni ti muka ladang sawit ti nyau deka mungkor serata pulau nya, ti mega ngemai pengerusak rampa menoa, ngenusah ke orang ti endang nguan pulau nya, lalu pia mega ngerachun semoa macham ikan ti dalam sungai ba pulau nya. Taib mega ditemi ‘muboh’ ke maioh duit ari geran perintah ke dalam kompeni iya empu dikena numboh ke projek skim padi ba pulau nya!
Pengerusak besekat-sekat
Diatu pengawa amu Taib udah ditemu lalu iya direport ke bisi nemuai ke Pulau Beruit lalu besemaia deka ‘ngemansang’ keh pulau nya. Enda laun nya? Pengawa jual-beli tanah ba pulau nya udah dikereja enam taun ke udah, lalu Borneo Post madah ke pemerinsa ti ditapi orang ti diau ba pulau nya.
“Bala orang ba Pulau Beruit benong idup dalam pemerinsa” pia ko berita ti ayan ba Borneo Post. “Orang ba pulau nya tau disebut ke idup ba ikas pemerinsa ti balat, lalu sida iya disema ke baka idup manok – keranjai pagi, empa pagi. Bala orang ti berikan semina ulih belayar empat bulan dalam setaun, lalu sida semina bulih RM350 sebulan, lalu orang bumai semina bulih RM300 sebulan”.
Enggau pengeraja Taib ti udah diayan ke, sida sebilik mengkang nerima untong masuk berjuta-juta ringgit ari tanah rampas lalu bejalai ke pengawa jual-beli tanah-tanah nya. Nama kebuah orang di endor nya nadai nerima nama-nama, lalu nama kebuah sebedau report pengawa salah iya diayan ke, orang menoa nya nadai nerima nama-nama?
Enti sida Taib sebilik amat bisi penyinu ke orang ti sebansa enggau iya, iya tentu enda kakang ati magi sekeda ari duit RM40 juta nya kena mampas orang dia. Sida tentu deka nyamai agi ngidup ke diri.
Tang sida sebilik nadai penyinu mimit nyentok ke berita pasal penyeranta orang di menoa nya nyau ayan nengah internet, tau ke nengha media ke bukai. Diatu baru Kepala Menteri nemuai kia mai macham-macham perambu (plans). Lalu semoa perambu nya dikena sida ngulih ke maioh agi duit bantu perintah kena bejalai ke projek-projek dia. Ari semoa penyampau nya, berapa semoa duit nya betul-betul dikiena ngangkat ke pendiau enggau pengidup orang ba pulau nya, lalu berapa penyampau duit deka pulai ke sida Taib sebilik?
Taib tentu ulih nulong, enti iya deka – iya kaya amat!
Enti Taib endang ka nulong bala orang ba pulau nya, tentu iya dulu ngena duit IYA EMPU kena meli enjin api (generator) enggau ai paip beresi. Iya patut meri sekeda ari duit untong ari ti ngambi tanah orang menoa nya. Nya pan, iya kala didinga nyebut, “aku bisi duit lebih ari ti ulih dipelanja aku”. Enggau tu, Sarawak Report meri penemu suh Taib ngasuh iya meri bala orang ba Pulai Beruit sekeda ari duit iya nya. Bisi enda kini iya terunding ke utai baka tu maia iya nurun ke Mekah ba bulan nyin kemari? Bemimpi dia mih, iya nyau enda iboh ke bala orang Islam lebih ari iya ti udah kala ngelakar orang bansa bukai di Sarawak!
Seruran diasoh “nganti”
Baka ti ngelama tu, Borneo Post ti dikuasa perintah mansut ke penerang, madah ke rakyat diasoh nganti ‘pemansang’ dianjong suh menoa sida. Sida tu udah nganti 30 taun, lalu nama reti empat-lima taun ti ka datai? Siko tuai raban bansa madah ngagai suratkhabar nya, rakyat di menoanya beguna amat ke ai beresi, tang:
“sida di menoa nya udah dipadah ke perintah deka meri sida ai beresi dalam taun 2012. Naka ke diatu sida bepanggai ba ai ujan ke dempa, bebasu enggau ngereja pengawa bukai.” Borneo Post mega madah ke ba pulau nya bisi jalai alun bebelakin semanjai 7 ngagai 8 kilometer ari Kampung Bruit ngagai Kampung Tekajong, lalu diatu bisi kira seperempat ari penyampau tuboh sida dia diau di luar pulau nya.
Jako semaia maya bepilih
Diatu semoa rakyat Sarawak patut udah teleba lalu ngadang-ngadang enggau jako semaia “perambu projek-projek”, ti ngelama tu endang suah disebut tiap kali maia pilihanraya. Nya alai, Taib tentu nadai maioh macham utai ka diberi ke rakyat Pulau Bruit dikena iya menang ba endor nya, enda baka nya? Iya tentu agi ka ngumbai rakyat ba endor nya chukop merinsa sereta beli!
Renggat-renggat pemansang
Borneo Post bisi ga mansut ke jako Taib ti meri alas an “nganti dulu mih, laban pemansang deka dianjong kitu berenggat-renggat”. Nya mih kebuah Sarawak Report deka berati ke bukti renggat-renggat pemansang:
– Renggat satu, Taib ngambi tanah NCR kitai lalu nyerah ke hak tanak nya soh iya mempu enggau sida sebilik.
– Renggat dua, Taib nyual tanah NCR nya enggau rega berjuta-juta ringgit soh towkey ti kaya-kaya ti udah nya lalu meri iya share dalam kompeni awak ke iya agi mengkang ngulih ke untong dia.
– Renggat tiga, kompeni nya lalu nebang semoa kayu ti berega ti ngujong ke menoa nya nadai agi endor kitai begiga ke pemakai.
– Renggat empat, kompeni nya berengkah nanam sawit bedandang besai ti ngujong ke ai sungai kitai berachun, lalu munoh semoa macham utai idup dalam sungai ba endor nya.
– Lalu renggat lima, jako gerah pasal “program pemansang” dipansut. Aram kitai meda renggat kelima, laban ba renggat tu mih kitai deka meda bantu enggau pampas dianjong soh kitai.
Renggat lima
Pulau Bruit diatu udah masuk ba renggat lima ti disereta ke jako gerah pasal duit RM400 juta deka dipelanja dia kena ngangkat ke pemanah pendiau bala orang ti diau dia. Diatu baka ni chara Taib deka ngena duit ngemaioh nya, ti endang dipegai iya? Udah tentu, udah 30 taun perintah iya enda melanja ke duit pulai ke pengelantang orang dia, tang pulai ke penguntong iya empu.
Pekara ti terubah deka diperati ke kitai, enti nyema duit nya bisi diagih ke ila, sapa bagi sida menyadi, anak menyadi, tau ke bala anak iya deka bulih kontrak ngereja projek-projek di menoa nya? Udah nya kita deka berati ke berapa agi duit tinggal udah pengawa-pengawa dia diturun ke ngena chara sub-kontrak soh kompeni bukai? Berapa deka diputong iya, 50%? 77%, tau ke lebih ari nya?
Ke penudi iya, udah kompeni kontrak bulih pengawa bekereja di endor nya, berapa agi duity deka dipelanja udah semoa putong dipejalai ke? Ujong-ujong bisi utai deka digaga dia (enti duit agi bisi belaloh), tang udah tentu enda nguntong ke orang di menoa nya. Kitai nyangka ka meda projek ngaga jalai alun ari ladang sawit lalu nuju pengkalan, tau ke kilang sawit? Tau ke sebuah upis kompeni sawit ti baru? Tau ke rumah-rumah enggau perengka dikena meresi ai irup ke diguna bala pekereja ari Indonesia?
Anang enda ngadang, sebedau kelalu laun!
Perintah ti lurus ati enggau bulih pampas nengah pechara dalam court mih ti disadang orang Pulau Bruit – manah agi sida bepanggai ba tuai PKR Sarawak, ti mega siko lawyer, iya nya Baru Bian, dikena nyaup sida di menoa nya ba pengawa bechara ngelaban raja penchuri, Abdul Taib Mahmud.