TABI PUJI KE KITA, SIBU!
Bala raban BN datai ke Sibu mai bemacham-macham janji enggau semaia pasal pengawa beranak ke puku dagang. Sida nabur ke propaganda nengah maioh macham media baka TV, radio enggau surat-suratberita.
Pekara ti enda ngasoh ati lantang iya nya, enti sida enda dipilih sekali tu, menoa nya deka diukum. Tang taja pan balat dikeremba’ ngena jako emba, orang di Sibu udah nemu tuju asal ati sida BN tu; orang Sibu udah mutus ke runding diri empu, muai BN ari menoa Sibu!
Menoa Sibu tu sebengkah menoa ti kering sereta bisi kuasa. BN beguna amat ke Sibu lalu orang di Sibu nyau udah nemu, taja pan sida diemba-emba, diatu sida diumbok laban BN agi mengkang beguna ke sida. Baka endor bukai di Sarawak, orang Sibu udah bulih pelajar pasal tipu enggau penyalah ‘makai suap’ ti dikereja perintah Taib. 30 taun iya udah ngator pengawa di menoa tu semina dikena ngulih ke penguntong diri empu aja. Semaia iya nadai mai reti ti nyentok.
Penyalah ‘makai suap’ rambau pengawa bepilih mit bisi nyerangkap menoa Sibu. Raban orang ti ngemata ke pengawa bepilih di Malaysia, MAFREL, bisi ngaga beberapa iti pansik: semak 20 iko bala menteri ti diulu ke Menteri Besai, besilih-silih ngeluar ke duit bantu, lalu ga sida nya semina besemaia maia nya. Penyalah tu endang udah ngelanggar pengawa bepilih lalu pia mega penyalah salah guna duit perintah dikena meli undi. Tu terang amat ngayan ke raban BN ngelanggar Akta-Akta Kesalahan Pilihanraya taun 1954 enggau Akta Anti Rasuah taun 1997. Tang, baka ti endang disadang ba perintah kitai ke diatu, bala sida Suruhanjaya Pilihanraya (SPR) enggau Agensi Penagang Penyalah ‘Makai Suap’ Malaysia (MACC) endang nadai didinga engkeretik.
Bala pengundi di menoa Sibu udah ngelala sapa ti patut diundi sida. Sida udah nulak BN taja pan BN bebendar amat ngulih ke sukong ngena maioh macham chara tipu sereta nagang chara ngundi ti betul sereta lurus. Sekali agi, MAFREL bulih bukti ti nyelai. Sida MAFREL tetemu ke beribu-ribu iko pengundi dipindah ke nama ari endor sida iya patut ngundi – sebengkah chara lama dikena ngumpan pengundi ngambi ke datai ngundi ba endor ti ‘salah’ lalu ditagang ngundi ba endor nya. Pemaioh orang ti datai ngundi mega ditemu niki ari 59% ngagai 70% – kami enda nemu ari ni penatai pengundi 11% ti betambah enggau ngenyit nya. Endang baka selama mega, maia ti ngitung ngundi, pengari parti bukai endang enda dibai nengkila ke pengawa nya. Tang, taja pan dikachau BN baka nya, Sibu udah mujor nulak BN!
Numbas mih RM200 ‘suap’ ti diberi sechara terang-terang olih BN soh bala pengundi di Sibu
Diatu BN enda tau enda jera, lalu belajar ke chara lama nya enda ulih guna agi. Kepala sida ti nyau majak tuai nya udah lelak, lalu enda dapat agi ‘ngenggam’ bala pengundi ba Sarawak ti udah mansang moden tu. Kroni suratberita iya bebendar amat bekereja nulis pasal pemanah iya, tang nadai pemujor narit ati pengundi. Diatu pengundi di Sarawak udah pintar agi milih sapa ti patut dipilih sida, laban sida deka ke ubah lalu madam ke penyalah ‘makai suap’ ti lama udah nyadi.
Tabi puji ke kita, Sibu. Diatu bala rakyat Sarawak ti bukai deka nitih ke singkang kita.