Kompeni Sime Darby nya sebengkah kompeni pemadu besai di Malaysia lalu pia mega nyadi konglomorat bekebun sawit pemadu besai di dunya. Kompeni tu dikemataka sereta dipejalaika Perintah Malaysia.
Enggau nya, kitai mega udah ninga pasal penyalah makai suap kompeni nya baka ti udah pansut ba pengawa nangkap lalu nuduh siku orang ti udah kala bekereja nyadi Kepala Eksekutif ba minggu tu tadi bekaul enggau penyalah ngelesapka bejuta-juta ringgit.
Pekara ti tau ngerak runding bala orang di menua Sarawak nya tuduh nya dikaitka enggau pengawa ngerampas tanah NCR ti dikereja Kepala Menteri Sarawak Abdul Taib Mahmud enggau orang kanan iya, Menteri Pemansang Tanah Sarawak, James Jemut Masing.

Pengawa ngerampas tanah

Dalam kandang sepuluh taun, ‘Model Baru Pemansang’ ti dipunka Jemut Masing ba tanah temuda enggi bansa iya empu udah ngujungka mayuh macham penusah di serata menua Sarawak.
Baka ti kala udah dipecharaka dalam court dulu ari tu, pengawa kunsi ti dipejalaika nya nadai kala nerangka enggau silik gaya atur ngagai bala orang ti bempu tanah temuda sida ti udah diambi nya. Sida mega nadai dibayar sebarang pampas tauka dipedua untung ti nyengala udah tanah temuda enggau kampung sida dikeruga, ti diatu udah ditukar nyadi kebun sawit Sime Darby enggau kompeni bukai ti besai-besai.
Tang Jemut Masing majak merambu deka ngulihka sejuta hektar agi tanah NCR dikena neruska juluk ati iya, ti ukai semina mai penusah ke mensia tang mega deka ngerusak rampa menua di Sarawak.
Mayuh kandang menua ti dipilih Jemut Masing udah diserahka iya ngagai ‘pengawa kunsi’ di menua iya empu di Kapit, nyengkaum tanah ti diambi lalu diserahka iya ngagai kompeni Natural Ambience Sdn Bhd enggau Vertical Drive Sdn Bhd, ti nyual semua tanah nya ngagai siku kroni parti BN ti benama Chew Chiaw Ann, ti udah nya dijual ngagai Sime Darby dalam taun 2008 enggau 2009.

Nya kebuah, pengawa dagang ti baka tu udah nyadika subjek pansik penyalah makai suap diatur dikena ngelaban Kepala Eksekutif Sime Darby ti dulu suba, Ahmad Zubair.
Dalam pansik ngati ke diri ti dipejalaika Sarawak Report, terang bendar ngayanka semua tanah NCR nya dijual nengah opis Lembaga Pembangunan dan Lindungan Tanah Sarawak ti betuaika Taib betaun-taun tu udah ti endur opis nya nerima jaku tanya laban udah meri penguntung ngagai semina siku-dua orang aja ti bisi kaul politik enggau Kepala Menteri tauka sida sebilik.
Ambi ke banding, dalam repot kami dulu ari tu kami udah mansutka juluk ati Jemut Masing enggau sapit iya, Mong Dagang udah kala minta bagi RM70 juta ari asil nyual tanah NCR enggi bala pengundi iya empu!

Tang, ba sebengkara pechara dalam court ti benung dipejalaika dikena mantaika penyalah tu, dini endur agenda ‘sayauka rampa menua’ enggau ‘tanggunpengawa ke mensia mayuh’ baka ti seruran disadaka kompeni pemadu besai di Malaysia nya?

‘Gelung Korporat’ ti disukung Jeffrey Sachs

Dalam taun siti nyin kemari kami kala nulis sebengkah repot pasal pemuntan Sime Darby lebuh kami mansutka jaku tanya bekaul enggau pemasuk kompeni nya ke dalam ‘gelung korporat’ baka ti diperambuka siku orang ti landik pasal ekonomi ari New York, Jeffrey Sachs, siku tuai Universiti Colombia, ti nyadi Profesor Pemansang Berterusan sida.
Sime darby udah ditemu mayar duit upah ti mayuh ngagai sebuah kompeni PR ti udah kamah nama, FBC Media dikena ngelakuka imej ekologi iya, baru udah meri duit tulung setengah juta dollar ngagai institusi enggi Profesor Sachs, ti endur bala orang ti melanja iya dipandangka nyadi pemungkal pengawa keberterusan.
Malu bendar kompeni FBC Media ti enggau tekala nya ngaku sida udah bulih Jeffrey Sachs nyadika siku pengari ke kompeni sida.

FBC Media udah ngayanka Sachs nyadika pengari Sime Darby nya sebengkah kompeni besai ti bejalaika pengawa dagang sida belalauka undang-undang menua dalam timpuh ti lama.

Setaun udah nya, udah skandal makai suap ti ngujungka Ahmad Zubair ditangkap dalam taun 2010 suba, Jeffrey Sachs lalu mupuk ngenyauhka diri – kompeni Sime Darby lalu enda agi ngemasukka nama iya dalam rintai nama orang dalam ‘gelung korporat’ sida.

Tang Profesor Jeffrey Sachs udah ngena kaul iya enggau perintah rejim BN Malaysia (ti bempu Sime Darby) lebuh iya bejalaika kempen dikena iya ngulihka penuduk Presiden ba Bank Dunya!
Sachs ngaku diri siru sereta ngarika penyeranta mensia di serata dunya enggau pengawa keberterusan. Siti ari menua ti nyukung Sachs ba penemu tu iya nya menua Malaysia!
Ke bendar, penayalah makai suap di menua Malaysia, lebih agi di Sarawak enggau Sabah udah nyadika sebengkah kuasa di belakang pengawa ngerusak rampa menua enggau kampung di Borneo lalu mega ngelanggar atur pengelantang mensia ba bala orang asal iya.
Enti Profesor Sachs endang amat deka nguluka pengawa munaska penyeranta mensia lalu ngetuka pengawa berusakka rampa menua, kami minta iya badu agi mantu rejim perintah Barisan Nasional ba pekara belanja. Diatu nyau udah datai ba maya iya kitai ningaka sada nyawa bala orang ti deka ngarika raban bansa orang asal di Sarawak!