Lebuh raban-raban penyukung majak bepechah dalam gerempung BN, semua jaku pesu orang nya endang bejuluk ati deka bebalas dendam.
Najib diatu benung napi jaku kutuk dalam parti iya empu, UMNO, ketegal ari pengusut undi pemanah ulah, lalu parti iya diatu benung bejuraika baka ni chara dikena sida ngalahka iya lalu dikena sida ngambi pulai kuasa sida atas menua Malaysia, baka ti dikereja sida dulu suba.
Sebuah kerita ti buruk dipejalaika deriba ari penuduk di kemudi?
Dulu ari tu, Sarawak Report bisi nusui enggau silik pasal pekat dikena ngelabuhka Taib ti diatur seraban orang dalam parti PBB iya empu ti betuaika Awang Tengah, tang berita ti angat agi diatu iya nya pasal sebengkah pekat bala orang dalam parti UMNO ti deka ngelabuhka Najib, ti deka diatur sida sepengudah tembu bepilihbesai tu ila.
Tu mai reti, bala peranak menua Malaysia deka ngundi siku tuai ti dikedekaka sida, tang udah tembu bepilihbesai, tuai nya deka ditukar enggau tuai ke bukai ti ukai aruh ati mensia mayuh.
Orang ti diatur sida nya, iya nya Muhyiddin Yassin ti kurang agi dikerinduka mensia mayuh ketegal pendiau iya ti lengkar, regas sereta kasar agi ari Najib. Orang ti nyadi dalang dalam pekat nya iya nya menteri besai Malaysia ti dulu suba, Mahathir Mohamad, siku orang ti nadai pechayaka diri empu udah pinchin ari pengawa.
Lalu bala penyukung Mahathir dalam UMNO nya bala penyukung tegar ti deka ngambi pulai Zaman Gemilang parti nya, baka ti udah dikereja sida suba, lalu sida mega deka ngelaban sebarang sapa ti mantah atur perintah sida.
Semua orang udah nemu pasal timpai enggau juluk ati Mahathir, ti kala merintah Malaysia enggau chara kukut besi ti mega nyadika siku tuai menua ti udah ngapuska sistem atur pechara bebas, suratberita ti bebas, kuasa polis ngatika diri ari pegai perintah enggau sistem pengereja pengawa ti ngatika diri dikena iya nentuka kuasa eksekutif iya enda ulih dibantah sapa-sapa.
Mahathir udah mujur ngenanka penaluk bala penyukung dalam UMNO iya enggau chara meli sukung sida ngena asil ari nyual minyak enggau ges ari menua Sabah enggau Sarawak. Tang, Mahathir udah tebuai ari pengawa Menteri Besai iya ketegal ti enda agi dikerinduka mensia mayuh, lalu parti UMNO majak berundingka chara bukai ti baru dikena sida ngenanka diri dalam kuasa perintah.
Abdullah Ahmad Badawi udah ngepunka proses nya tang penanggul pejalai proses nya udah ngujungka raban parti penyakal nyadika raban ti majak mujur agi ba bepilihbesai taun 2008 suba.
Tang raban orang dalam UMNO udah ngena kelai nya dikena ngenanka iring Mahathir, lalu Mahathir empu mega udah nyadika kuasa dikena sida nulak Badawi sepengudah sida dituntung ‘penusah’ demokrasi nya.
Muhyiddin Yassin dipeda manah agi ari Najib, ti endur Najib dipeda nyadika siku tuai ti lemi enti dibandingka enggau Badawi, ba atur pengawa iya ti ngayanka menua Malaysia ulih berubah lalu ulih nyingkang sama enggau menua bukai ba atur bebasaka pengelantang mensia enggau bebasaka demokrasi.
Pekara ti ngemediska pala bala orang dalam UMNO diatu nya pengawa bepuluh ribu iku bala orang bejalai bebala mayuh ti nyukung penemu raban parti penyakal, lalu enda dikibuhka bala perintah. Sida disadang deka ngena pengasar nagang pejalai bebala mayuh nya, tang sida udah berundingka penemu mensia mayuh di serata dunya ti udu ngemeranka basa ngagai pengelantang enggau pengelikun mensia.
Langur penemu ti muntang
Diatu Najib benung napi tekan ari semua segi. Iya endang siku tuai ti lemi, tang majakka diri dibalut penyalah makai suap baka ti dikereja BN ngenanka kuasa sida beberapa puluh taun tu.
Agi mega, sapa-sapa ti ngepunka pengawa iya bepelasarka penyalah makai suap, iya endang nadai kini-kini, lalu penyalah nya mega dikereja dalam dini-dini parti politik ti bekuasa.
Bala penyukung Najib ti digempuruka ke semina beberapa ribu iku aja dipeda kurang regas, lalu sida diagihka ngena bantu beras ti udah nya nusui baka ni BN udah suntuk bendar runding sereta suntuk penemu ba kaul sida enggau bala penyukung sida.
Tang Najib ti bepenemu moden agi nya udah nemu iya mega enda tau enda napi ubah. Nya kebuah UMNO udah ngelabuhka Mahathir suba, lalu mega udah ngujungka ‘penusah’ tsunami politik mangka dalam taun 2008.
Diatu terang bendar enti deka merekahka parti nya tentu deka ngujungka tekan majak betambah lalu enda ulih tapi agi lalu iya deka pechah di sebarang maya.
Tang, nitihka diperatika sekeda bala orang, tu meh atur pengawa ti diperambuka Mahathir. Iya deka ke Muhyiddin Yassin megai perintah sepengudah bepilihbesai tembu, iya nya ngena chara rampas kuasa maya aum besai UMNO ti lama bendar udah enda diatur, lalu enda tau enda diatur enggau jampat.
Mahathir, ti ulih nguasa pending bala peninga dalam parti iya, laban iya dipeda udah mujur megai kuasa lalu ngujungka sida nyadi kaya, tang diatu iya dipeda benung ngujika pemerani iya, laban sukung ari dalam parti nya udah majak tendu laban pengawa bepilihbesai lama bendar udah dilanjarka.
Perambu Mahathir nya muntang bendar, iya nya ngena tukuh Najib ti jelan pemanah nya, iya nya 20% mudah agi diterima mensia mayuh enti dibandingka enggau Muhyiddin, dikena napi bepilihbesai, lalu udah nya ditukar. Bala penyukung tegar UMNO endang dipelabaka nyukung Muhyiddin ti lengkar agi pendiau nya deka ke parti sida mujur bulih undi.
Ngelakar baru
UMNO enda dipeda irau ati ba pekat sida nya laban sida endang bejalaika pengawa ngelakar bala pengundi sida ngemesaika siku tuai ti dikerinduka, tang enti iya lemi iya lalu tekala nya ditukar enggau tuai ti regas sereta lengkar agi ngambika tau dikena sida bebulaka demokrasi enggau pengelepas.
Tang UMNO sekali agi dipeda nipu lalu nyuap bala pengundi sida dalam pengelama beberapa taun tu udah.
Enti jaku telai pasal pekat dikena ngelabuhka Najib nya ukai cherita ti bendar, kitai tetap nganti saut ari Mahathir enggau Muhyiddin lalu ningaka sukung enggau penaluk seduai iya ngagai Najib baik ke sebedau tauka udah tembu ila. BN enda tau enda ngambi kira pekat sida ti jai nya kejang ti deka napi bepilihbesai ti semakin hari semakin puntan nya.
