Mensia mayuh bisi bendar pengirau ati ke penumbuh sebengkah program ti digela Malaysia 6P ditagaka dikena ngerejista bala pengundi baru, berebak enggau Projek IC di menua Sabah.
Program ti dikumbai BN dikena ngampun bala kuli menua luar nya ti endur sida nya dipinta nerangka ikas penama sida ngagai menua Malaysia lalu mega mayar sebengkah penyampau ngambika sida ulih diberi permit kereja di Malaysia dalam pengelama dua taun.
Tang Sarawak Report udah bisi bulih penerang ari bala agen ti diupah BN dikena bejalaika pengawa ngeluarka permit kereja dikena sida ngisi tabung bepilihbesai ke BN.
Ngena program nya lebih kurang 372,000 iku kuli menua luar digelumuka ba tanah lapang, kilang enggau tapak projek ngaga rumah lalu diangkut ngena bas ngagai palan pengerejista. Sida kuli nya tauka bala pemayar gaji sida dipinta mayar RM4,000 ke siku anak kuli ngambika ulih diberi permit kereja ti mega dikena nyeliahka sida dianjung pulai ngagai menua asal sida, lalu bayar nya enda tau enda ngena mata duit.
Dalam atur nya perintah udah meri arah ngagai 340 buah agensi sida bekaul enggau jaku gerah di pandak bendar timpuh nya, udah mai penyaru penemu ke semua orang ti bekaul ba pengawa nya.
Mayuh ari bala anak kuli menua luar nya dikelakar lalu bisi mega sida diemba enggau jaku dikena nganjung sida pulai ngagai menua sida empu.
Bisi mega pengirau ati ti madahka semua penerang batang tubuh bala anak kuli nya disadang deka dikena nambahka penyampau nama ti nyelai enggau endur diau ti baru dikena ngisi rejista pengundi ke sitak menua ti deka diambi BN.
Tang Sarawak Report bisi diterangka tuju ke bendar program nya endang dikena ngulihka bebilion-bilion ringgit mata duit ti deka dikena UMNO ba pengawa bepilihbesai tu ila.
Mata duit satu setengah juta ringgit ‘disimpan’ nyentukka sadau dalam sebuah bilik
Enggau pemayuh 370 ribu iku orang mayar RM4,000 siku, kitai tau bulih saut RM1,500,000,000 tauka 1.5 bilion ringgit dalam mata duit tunai ti udah dikena.
Sebengkah penerang madahka ngagai Sarawak Report ti endur siku ari agen ditemu nugungka duit dalam sebuah bilik mit ba sebuah rumah ti ditagaka deka diambi bala tuai-tuai politik sida.
Enggau jaku tuduh nya, terang bendar Opis Emigresyen beempu tanggungpengawa bejalaika program Malaysia 6P nadai meri penerang ti silik program lalu mega berapa pemayuh duit ti ulih perintah ari program nya.
Irene Fernandez ari raban Tenaganita, iya nya sebengkah NGO ti ngemataka pengelantang enggau pengelikun bala anak kuli ti dituntung penanggul, madahka nadai sebarang penerang ti silik dalam ungkus enggau belanja ti ulih ari program nya naka ke diatu.
“Kami semina dipadahka sistem biometric nya berega RM335 lalu RM300 ari nya diambi bala agen” ko iya, “lalu kami dipadahka RM180 nya dikena mayar ungkus bejalaika ujian pengawa berubat, nya aja”.
Irene Fernandez mega ngamatka penerang ti madahka semua anak kuli ti diarika iya nya dipinta mayar enggau mata duit dikena ngulihka permit kereja. Irene madahka ngagai Sarawak Report iya enda tekenyit ti ngumbai jaku tuduh orang bekaul enggau semua duit ti ulih ari pengawa nya deka ditagaka ngagai BN.
Enggau 10,000 iku anak kuli ari menua luar ti berejista nya napi penanggul deka dianjung pulai ngagai menua asal sida, sida mega napi pengawa nipu dikereja bala agen ti diupah BN, diatu bulih mayuh agi penerang pasal kaul agensi ti dipilih Opis Emigresyen enggau parti UMNO/BN.
Sebengkah chunto ti nyengala pasal kaul bala kroni BN dalam pengawa tu iya nya pasal kompeni SNT Universal Corporation, ti endur bala pemesai sida bisi ditemu menyati bala anak kuli ti endang patut diberi pas kereja.
Siku Pengarah kompeni nya iya nya Menteri Pengelikun Dalam Menua ti dulu suba, Mohd Radzi Sheikh Ahmad bisi ditemu bulih penuduk nya sebendau penetap ngampun bala anak kuli menua luar dalam bulan Lima 2011 suba.
Nitihka pansik ti dipejalaika Free Malaysia Today, kompeni SNT nya bisi kaul enggau kompeni besai-besai ti bukai ti nyarung diri nyadi pemesai pelesu dikena sida ngenanka bala kuli ari menua luar ti lalu ngerejista sida dalam program Malaysia 6P nya.
Enggau nya, kada enda semua duit nya deka diagihka ngagai orang UMNO enggau bala kroni sida? Enti amat munyi nya, pengawa nya udah melakangka pengelantang pendiau raban orang ti merinsa mensena di Malaysia. Kada enda bala orang ti merinsa nya ila deka disuap ngena duit ari tabung nya lebuh datai maya bepilihbesai tu ila?