Sekali ke Menteri Pemansang Tanah Sarawak nya udah dikemendarka ngamatka semua jaku kutuk enggau jaku bantah orang mayuh bekaul enggau projek-projek gila ngaga tekat hidro elektrik ari buah runding Kepala Menteri, lalu belabuh besetuju enggau penemu raban parti penyakal enggau gerempung-gerempung NGO rampa menua ti madahka semua projek nya nadai meri sebarang penguntung?
Enti jaku James Masing nya betul, ulih tauka enda Kepala Menteri nya enggau jampat lalu ngena kuasa iya ngamatka jaku ngarika Perintah Menua Sarawak madahka perambu ngaga 8 ari 12 iti tekat besai-besai nya enda tau enda diketuka?
Lebuh ti ditanya pengarang berita ari agensi berita AFP, James Masing bisi mansutka jaku “Kami [Perintah Menua Sarawa] enda tau enda meratika baru semua perambu kami nya. Iya ukai perambu ti mutus dikena kami ngaga 12 iti tekat. Aku empu ngasaika kami enda begunaka tekat ngemayuh nya. Numbas iya enggau empat buah tekat aja baka ke bisi diatu”.
Sekali ke tu nyadika polisi baru ari perintah? Nyentukka sehari tu Taib Mahmud enggau bala menteri iya endang chakah madahka semua tekat ti diperambuka nya beguna amat dikena nyukung program industri dalam kandang projek SCORE. Enti penyampau tekat nya dikurangka, projek SCORE nya tentu deka diketuka sekali tauka ditangguhka enda lama?
Jaku James Masing nya dipeda lebih agi munyi ti ngaku penyaru penemu BN ti udah napi jaku bantah ari orang mayuh. Tang nama kebuah kitai semina nemupasal utai tu ari jaku randau entara siku menteri enggau siku pengarang berita?
Nama kebuah Taib Mahmud empu enda datai ngagai rumah Dewan Undangan Negeri Sarawak lalu mansutka jaku ba endur ti pemadu rasmi madahka SCORE nya sebengkah projek ti nadai guna?
Tauka, sekalika kitai mayuh tu benung meratika kaul beserekang ti berupai dalam serakup BN ti endur bisi sebagi ari bala sida dalam BN endang enda besetujuka SCORE lalu nyadika chara sida ngemaniska agi jaku kimpin sida dikena ngulihka undi kejang deka bepilihbesai tu?
James Masing terang bendar dipeda lurus ati maya ti ditanya nya ti endur iya madahka penemu enggau jaku bantah orang ngagai projek tekat ai tentu deka ngeruga penuduk bala kaban politik BN baka iya empu.
Enggau chara ngetanka kerusi sida ba mua bala pengundi sida ti seruran dipadahka pasal tekat ai ti deka ngampuhka genturung pendiau sida, lalu sida mega nyau mupuk mereti pasal pengawa nyuap pengundi nya enda agi ngasi.
Tang Taib Mahmud ti sumbung nya dipeda baka ti enda besedia ke penyaru runding iya ngira pasal perambu iya ti enda tau enda diketuka sekali. Ba minggu nyin kemari iya udah madahka guna kuasa elektrik di serata menua Sarawak mengkang enda chukup lalu iya merambu deka ngaga stesyen-stesyen arang batu dikena iya nyukung projek SCORE sekumbang ti nganti penembu semua projek tekat ai nya!
Senutuk enda kini penemu enggi James Masing nya ti madahka empat buah tekat udah numbas dikena ngisi peminta bekal kuasa elektrik di serata menua Sarawak? “Ukai semua atur ti dipejalaika kitai nya betul magang” pia ku James Masing, enda salah-salah baka ti mansutka jaku ti madahka projek SCORE ti datai ari penemu bos iya nya sebengkah atur pengawa ti udah puntan. Tang nama enda kini timbal Taib Mahmud ke jaku James Masing nya? Sarawak Report pechaya bendar Taib Mahmud tentu deka nyakal sereta bebulaka jaku menteri iya nya. Enti enda baka nya iya patut nerima pengamat ti madahka iya ukai siku CEO ti pemadu tinggi pangkat di menua iya empu.
Enti iya mangku pengawa dalam sebuah kompeni ti manah, iya enda tau enda minta diri badu bekereja ari kompeni nya.
Pia mega bisi siti agi penanggul ba jaku ari James Masing nya. Iya munyi orang ti deka matak penemu diri, tang pengawa nya enda chukup dikena ngulihka sukung BN ari bala pengundi sida. James Masing ngasaika sida enda tau enda neruska projek ngaga tekat Baram enggau Baleh, ti deka nengelamka pendiau bepuluh ribu iku asal di kandang menua nya.
Didingaka ari sukut politik, jaku James Masing nya munyi jaku orang politik ti pemadu enda beguna di dunya tu. Iya udah ngaku BN udah ngereja penyilap, tang iya mengkang enggai ngaku alah lalu matak diri ari projek Tekat Baram, lalu beduduk ari nya iya napi jaku kelese lalu majak lenyau sukung ke perintah ti diarika iya!
Taib Mahmud pan nemu mega reti jaku iya nya. Tang udah jaku James Masing nya dipansutka, jaku iya nya enda tau dikumbai jaku sengapa tempa. Sapa ti deka arapka sebengkah perintah ti udah numbuhka sesebengkah projek besai-besai enggau nadai begunaka sanding penemu ari raban pakar ti landik sebedau belabuh ngereja pengawa?
Taib Mahmud udah melanjaka bejuta-juta ringgit dikena bejalaika perambu iya nya lalu iya mega udah bebendar ngulihka beribu juta ringgit duit jali dikena narit ati bala orang ti deka beranakka puku dagang ari serata dunya, lalu nama kebuah ngemudah nya iya deka ngetuka perambu iya nya lalu nejuka semua duit nya dibasau baka nya aja?
Lalu baka ni ku munyi penerang ari tuai pengeluar kuasa ke Taib Mahmud , siku orang ti bebansa Norway ti endang keran bendar enggau perambu ngaga 12 buah tekat nya beguna bendar dikena nyukung pemansang di Sarawak lalu diteruska? Pengawa nya diteruska taja pan sida nadai ditemu bisi ngaga repot empas projek ngagai rampa menua (EIA) tauka repot empas projek ngagai pengawa dagang.
Torstein Dale Sjotveit udah beserebana ba mua orang mayuh ti madahka raban NGO rampa menua udah “mansutka jaku bula” pasal penanggul ti datai ari projek tekat hidro elektrik lalu guna tekat nya manah ke raky
Enggau nya, nama agi tindak Sjotveit udah tu ila? Peranak menua Norway nya udah nyadi siku ari kaban komiti besai dalam International Hydropower Association (IHA) lalu menua Sarawak mega benung begagaka projek tekat ai ti pemadu besai di dunya lalu iya mangku tanggungpengawa ngemataka pejalai aum besai nya di Kuching dalam taun 2013 tu.
Diatu projek-projek nya dipeda baka ke deka diketuka, lalu nama atur pengawa ti deka dipejalaika bala orang ti agi bisi ati deka beranakka puku di menua Sarawak?
Nyangka nya bisi entara sida deka ninggalka palan BCCK nya lalu meri awak ngagai raban badut ngatur aum besai badut serata dunya ti deka begempuru ba palan nya, laban pengawa bepilihbesai pan nyau semak.
Bala badut tentu deka ngaga ubah laban ngelama tu silak komik semina dikereja BN aja.