Siku ari orang ti pemadu beguna ke Kepala Menteri Sarawak Taib Mahmud, Torstein Dale Sjotveit, endang amat berega ba setiap sen ari gaji taun iya ti manggai $4 juta nya.
Nyadi siku CEO ba kompeni Sarawak Energy Berhad (SEB), Sjotveit seruran berasai temegah nyukung lalu ngelakuka tiap iti perambu Kepala Menteri, taja pan pengawa nya ngemasukka duit tabung rakyat ngagai kompeni-kompeni sida Taib Mahmud sebilik.
Pengawa ke diatu nya muka galau arang batu ngambika dijual enggau naka penyampat ngagai menua China enggau India ti ditemu meli arang batu enggau mayuh.
Nya alai, kitai enda alit ati meda Sjotveit dipaduka nyadi Pengarah dalam kompeni Sarawak Coal Resources Sdn Bhd, ti ditumbuhka nyadika perengka ba dagang kunsi nya.
Enggau jaku gerah ti dipansutka ba minggu tu ti nyebut pasal pengawa dipejalaika nitihka atur ti udah ditetapka Taib empu baka ti ngelama tu, Kepala Menteri ti mega nyadi Menteri Pekara Belanja ti lalu mega nyadi Menteri Pengeraja Asal udah netapka dagang kunsi nya dipejalaika menua Sarawak lalu diatur nengah kompeni-kompeni private (ti deka dipadahka ila) dikena ngulihka pengeraja asal Sarawak ti pemadu berega nya, tang balat deka ngerusak rampa menua enggau pengerai mensia mayuh.
Kitai diatu udah nemu Taib udah masuk dagang kunsi tu, iya nya dikena iya nambahka pengeraja iya empu. Bantu belanja dikena bejalaika pengawa nya datai ari tabung duit rakyat nengah dagang menua lalu penguntung ari pengawa dagang nya ila deka dipasukka ngagai kompeni-kompeni ti deka dipaduka, ti endang enggi sida sebilik empu.
Ke semua akaun nya, endang udah tentu deka dipelalaika, ngambika enda ditemu mensia mayuh bekaul enggau penguntung ari pengawa dagang arang batu nya ba tabung rakyat.
Beserimbai enggau nya, semua suratberita, TV enggau radio di menua Sarawak didinga begau gaga ati lalu nyukung pengawa bejadika dagang kunsi nya, enggau chara madahka mensia mayuh pasal pengawa ti nemu galau arang batu di menua Sarawak nya. Tang raban mensia di Sarawak ti lama udah merinsa, ti benung dituntung penyakit denggi deka terus idup merinsa, enggau gaya jalai alun ti majak jai, enggau mega perengka-perengka ti diguna ti enda dibiki.
Jaku tanya ti dikenataika mensia mayuh, baka ni saut ke semua dawa orang ti ngumbai pengerusak rampa menua enggau sungai di Sarawak nya dikena meri awak ke projek tekat dikena mantah penemu ti ngumbai projek ti “meruan” lalu ulih “diubah nyadi baru” nya tau ngelepaska menua Sarawak ari pengerusak rampa menua ketegal ti begunaka kuasa fosil?
Nya meh sekeda ari ketegal tauka kebuah ti dipansutka bala orang baka Sjotveit tiap kali iya napi jaku tanya ti baka nya.
Uji kitai meratika baka ni kompeni Hydro Tasmania ti udah diupah Sjotveit ngambika ngerandang jalai dalam projek tekat ai nya, udah mansutka penerang nama kebuah ti bendar, sebedau kompeni nya matak diri ari menua Sarawak suba.
Pekara ti tau bendar ngeruga runding kitai nya penyaru penemu baka ti bisi didinga dalam sara Taib dikena iya ngelamun juluk ati iya ngulihka 5 ribu juta tan arang batu menua Sarawak, baka ti dikenang iya enggau naka pengandal ati kemari.
Ba beberapa bulan ke udah, menua Sarawak kala dikumbai napi penanggul ngulihka bala orang dagang ti deka numbuhka palan pengeluar barang ngambika bisi begunaka kuasa elektrik ti dikeluarka ari tekat Bakun. Taib didinga meri kebuah iya nya kuasa elektrik deka bekurang ti enda tau enda disukung ngena kuasa arang batu ngagai sitak menua projek SCORE ti diperambuka nya.
Tang diatu mayuh orang udah nemu tekat ai Bakun enggau Batang Ai nya semina ngeluarka kuasa elektrik ti enda besai, lalu lebih kuasa ti bedau dikeluarka nya nadai nyadika penanggul kurang kuasa elektrik ke menua Sarawak. Tambah mega tekat Murum nyau deka tembu digaga nya deka nambahka pengelebih kuasa elektrik ti dikeluarka nya.
Dalam perambu tekat Murum ti deka tembu digaga nya, iya deka jampat agi dikena ari ti ngaga stesyen kuasa arang batu.
Ke bendar iya, jaku Kepala Menteri nya dikena iya nekanka juluk ati iya ukai deka ngaga stesyen kuasa arang batu, tang dikena iya nyual arang batu ke menua tasik baka menua China enggau India enggau rega ti tinggi ti endang lama udah bisi stesyen arang batu ti ngamahka angin enggau rampa menua di serata dunya tu ninting hari.
Enggau nya kitai diatu udah mereti pasal “perambu manah” Kepala Menteri nya. Iya ukai pasal ngeluarka kuasa arang batu dalam menua Sarawak tang lebih agi ba pengawa menua Sarawak meri bantu sabsidi ngagai pengawa kompeni-kompeni, enggau chara ngemendarka sida meli arang batu ngena rega ti mimit lalu udah nya nyual arang batu nya ngena rega pasar ti tinggi agi!
Kitai tau enda ibuh meragamka ni bagi kompeni ti deka bulih lisin bejalaika pengawa nya ila. Semua pengawa nya deka diatur ngambika semua kompeni nya bulih untung lalu penguntung ukai pulai ngagai tabung menua Sarawak tauka ngagai rakyat Sarawak empu.
Enti perambu kamah Taib tu dipejalaika dikena ngulihka galau arang batu Sarawak, Sjotveit tentu deka nyaut semua jaku tanya ari mensia mayuh di serata dunya, nyengkaum jaku tanya ari menua iya empu enggau adat ti terit menua iya empu ba pengawa nagang penyalah makai suap.
Kepala SEB nya udah ditemu bebalut enggau menyalah makai suap ti bekelingi ba kompeni-kompeni Taib bekaul enggau projek-projek tekat ai di Sarawak.
Kompeni CMSB enggi sida Taib sebilik nya udah nyadika penerima kontrak ti besai-besai ari SEB lalu kompeni enggi anak iya, iya nya kompeni Sarawak Cable udah ngambi semua kontrak ti besai-besai bekaul enggau kereja besambungka kuasa elektrik.
Taib endang suah ditemu ngulihka bagi iya dalam pengawa beranakka puku dagang ti besai-besai ti bulih lisin dalam projek SCORE, nyengkaum palan pengelebur aluminum OM Holdings enggau beranakka puku dagang enggau kompeni Rio Tinto Alcan ti enda bidik nya ketegal napi jaku bantah kami pasal pegai share 40% CMS dalam projek nya.
Pengawa ti ngulihka arang batu nya patut dipejuraika dulu dalam aum tebuka dalam rumah Dewan Undang Negeri Sarawak tauka rumah Parlimen lalu tender patut diberi enggau terang ngagai sebarang kompeni. Tang Taib seruran ngumbai diri ulih sepeneka ati iya meri lisin dikena ngulihka arang batu baka chara iya ti meri lisin ngagai Rimbunan Hijau ngulihka minyak ba darat menua Sarawak ba bulan nyin kemari.
Enti bisi seraban orang ngumbai kami sengaja ngemesaika penusah ari salah guna kuasa Taib dalam pengawa iya nguasa galau arang batu di Sarawak, sama-sama meh kitai ngambi kira ba utai ti endang amat nyadi diatu.
Ba raban bala orang ti macha blog kami tu, sapa ti udah ngaga stesyen kuasa arang batu di Mukah, ambi ke banding, ti udah mai penusah ti lama ngagai genturung pendiau orang ti semak enggau nya dalam taun 2009 suba? Nya endang tentu iya pengawa sida Taib sebilik nengah kompeni CMS sida, lalu Pengarah kompeni sida maya nya endang Torstein Sjotveit. Lalu sapa ti udah mujur bulih lisin ngulihka arang batu di Sarawak naka ke diatu? Saut nya ukai orang bukai – sida Taib sebilik enggau kroni dagang sida, WTK.
Sebengkah skandal ti kala bekelingi ba kes pemati empat iku penegereja pengawa ari menua luar ba sebengkah penusah letup ti nyadi taun nyin kemari udah narit ati mensia mayuh ngagai rekod pengelikun pengereja pengawa enggau ke rampa menua ti dikereja kompeni Luckyhill Mining, ti udah ngeruga rumah panjai enggau sungai ti menua Pantu nya. Sapa raban orang ti bempu kompeni-kompeni nya?
Sida nya kompeni WTK enggau menyadi indu Taib, Zaleha Mahmud, lalu pia mega bala kroni politik sida sebilik.