Josh Trevino enggau seraban bakih blogger iya ti bepengkalan di Amerika Syarikat diatu udah ngaku ba mensia mayuh bekaul enggau petenah sida ngagai bala orang politik Malaysia ti ngembuan runding pro-demokrasi, lalu bala blogger nya dibayar BN sereta mega udah dibantaika Sarawak Report.

Tang kami ulih nunjukka blogger Amerika ti manchal nya diatu sekali agi ditemu bula, lalu kemari iya udah ngaga diri enda ngelala ke sapa iya bekereja lalu iya nadai didinga ngaku diri kala bekereja ke Kepala Menteri Sarawak, Abdul Taib Mahmud.

Beberapa bengkah pengamat tebantai sereta lebuh Trevino ngerejista diri empu nyadika agen menua luar di AS

Trevino udah suah bendar didinga bebula ke diri empu ti gawa ke orang ari Malaysia, tauka iya enggau bala bakih blogger iya bisi dibayar upah. Lebuh iya bejaku enggau siku pengarang berita di menua AS, Ben Smith, sepengudah kami ti nusui pasal pengawa iya dalam taun 2011, iya udah ngumbai artikel ti ditulis kami nya “nyengala bula”.

Baka nya mega bakih iya ti sama enggau iya nuliska artikel pasal menua Malaysia, iya nya Christopher Baddeaux, bisi didinga kering agi penemu ti ngumbai jaku tuduh kami ti ngumbai iya dibayar upah nya “bula, sereta ngerachun runding orang”.

Tang lebuh maya iya ngisika penerang iya ti nyadi agen bekereja di menua orang, baka ti dipinta undang-undang AS, Trevino ngaku ba perintah menua iya bulan nyin kemari iya endang kala dibayar Perintah Malaysia. Jaku pengaku nya mujur ditemu bala pengarang berita di menua AS ti udah tetarit ati ke kaul Trevino dalam ‘perang cyber’ BN ti beresia nya. Penerang nya udah nunjukka Trevino udah nerima upah $389,724.70 ke pampas pengawa iya nya, lalu sebagi ari semua bayar nya dikena iya mayar seraban bakih blogger iya dikena sida nyerang bala orang politik parti penyakal baka sida Anwar Ibrahim lalu ngangkatka pemanah Menteri Besai Malaysia, Abdullah Ahmad Badawi, maya nya, lalu udah nya bekereja ke Najib Razak.

Bisi mega dirintaika nya penerang ti silik pasal bayar upah ke bala bakih blogger iya ti mantu iya nya ngena duit ti diterima iya ari perintah Malaysia nya. Bayar nya nyengkaum $11,000 ti dibayar ngagai Christopher Baddeaux! Tang Trevino udah enda mujur nerangka enggau silik, ti endur iya mega bisi kaul enggau Taib Mahmud di Sarawak. Trevino udah bekereja ke Taib Mahmud enggau chara numbuhka laman web Sarawak Reports, ti nyau deka sebaka nama enggau laman kami tu ti udah nya dikena nyerang lalu bejai nama editor kami.

Ba maya bepilihbesai 2011 nyin kemari, kereban server laman web kami udah diserang ngena “distributed denial attacks” ti udah nanggul kami dalam pengelama lebih kurang dua minggu. Trevino nadai nyebut pasal pekara tu lalu mega berapa pemayuh upah diterima iya, ti endur iya ditusuika bisi nerima upah $5 juta ke kontrak setaun ari Taib Mahmud di Sarawak.

Ba iya empu, bebulaka kaul iya nya dipeda baka ti sebaka enggau bebula berita enggi blogger Christopher Baddeaux dalam taun 2011 nyin kemari.

Aku enda ngelala ke sapa aku bekereja

Utai ti ngasuh ati geli iya nya Trevino madahka diri enda ngelala klien iya ari Perintah BN Malaysia.

Nitihka penerang iya, lebuh iya ti ditanya siku penulis dalam kolum suratberita di AS, iya enda kala bisi “klien ari bala orang tebilang ari menua Malaysia”.

“Aku enda tentu ngelala ke sapa gerempung APCO nya ngaga kaul, enda tentu nemu mega enggau sapa FBC Media nya ngaga kaul”, tambah Trevino.

Tang Trevino enggau bala bakih blogger iya udah ngengkahka gambar sida empu lebuh ti betemu enggau Menteri Besai Badawi ba rumah iya dalam taun 2008 lalu mega betanyaka penerang ari Zaid Ibrahim, siku menteri ba Opis Menteri Besai maya nya.

Trevino udah nuliska siti artikel pasal baka ni Menteri Besai nya udah mai sida seraban nya ngirup pagi ba rumah iya, ti diatu udah nyadika tuduh ti madahka iya enda ngelala klien iya nya sebengkah pemula.

Berebak enggau nya Trevino udah ngangauka beberapa iku blogger AS ngambika sama enggau iya dipelanja bechuti ke Malaysia ti nyadika tanda pengaga ati ke utai ti ditusui sida dalam blog sida.

Enda lama udah nya Trevino bekereja ke FBC Media, nyadika pengawa sida ngangkatka nama Najib Razak, ti endur Trevino belabuh nuliska artikel-artikel iya dalam blog baru iya, New Ledger, enggau mega ba laman blog bukai enggau chara ngemanahka nama Menteri Besai ti baru seraya ke bejai kaul Anwar Ibrahim enggau menua Amerika, sebengkah ari pengawa ti endur artikel-artikel iya diangkatka lalu dichelak ba surat-suratberita di Malaysia ti endur mensia mayuh enda nemu berita nya dipelanja orang Malaysia empu.

Enggau nya, sekali ke iya ngarapka mensia mayuh deka pechaya ke iya udah nadai agi runding sapa ti melanja artikel ti pro-Najib enggau pro-BN nya?

Trevino mega disengkaum dalam pengerami pemanah kaul (PR) ti diatur FBC Media ti endur Najib Razak dipeda balat dikemesaika nyadi siku ‘Muslim ti jelan iya’ ti patut bulih sukung ari menua Amerika. Tu nyengkaum jaku kangau ngulu sebengkah program sara penemu ti diatur BBC World Service di menua Istanbul ti endur Josh Trevino enggau enda mukai-mukai angkat lalu mansutka sebengkah jaku tanya dikena nulung raban tukang gambar ari TV maya nya.

Josh enggau enda mukai-mukai angkat lalu mansutka jaku tanya pasal Najib ti udah melanja pengerami nya nengah FBC Media ti endur iya bekereja

Lalu enti sida enda diupah nama kebuah sida deka masau jam enggau tulang sida bejai siku orang politik ari menua Asia ti enda tentu silik dikelala sida, ke lebih agi siku orang politik ti bepenemu liberal lalu ngembuan pelajar ti tinggi, lalu mega rapat bekaul enggau raban democrat di menua Barat?

Bala blogger baka Baddeaux udah besak lebuh sida mansutka asil tulis sida ti dibacha bala pemacha ti beobjektif (ari luar sengkaum raban BN).