Sebuah suratberita ti tebilang di Britain, The Independent, bisi nuliska repot ti madahka pengaga filem cherita bejalai, Ben Fogle, udah matak diri ari kontrak PR ti dikena nguji ngangkatka nama ‘eko-temuai’ Sarawak.
Suratberita nya nusui pasal Sarawak ti nyadika “sebengkah rejim perintah ti ngembuan rekod ngerusak rampa menua entara ti pemadu jai di dunya tu”.
Ben Fogle madahka diri “berasai nesal ati” udah iya nemu pekara ti bendar pasal pengerusak rampa menua enggau mega penyalah makai suap dikereja perintah Taib Mahmud di Sarawak, ti endur The Independent bisi ngamatka penerang madahka “industri ngulihka kayu batang ti besai bendar rampa udah ninggalka laluh rampa kampung bungas 5% ti apin dikeruga tauka dibuka nyadi kebun dandang besai sawit.”
Ba minggu nyin kemari Sarawak Report udah mantah kaul Ben Fogle dalam kimpin ti dipelanja kompeni PR ti ditanggung Lembaga Dagang Temuai Sarawak, nengah kompeni PR Hills Balfour, ti nuliska repot sida pasal jelu mayas ‘ti siga’ nguan kampung ‘dalam’ di menua Sarawak.
Ke bendar, Fogle udah ngaku diri kala digambar enggau jelu mayas ti dikurung dalam sangkar, ti udah diburu ari kandang menua asal sida ketegal meri awak ke pengawa nebang kampung enggau muka kebun dandang besai sawit ti benung chakah dipejalaika.
Sama bisi dikaitka dalam pengawa ngaga filem nya kemari, siku tukang gambar (baka ti bisi ditusui dalam majalah Hello enggau suratberita Telegraph) iya nya anak indu MP Jacob Sagan dari sitak parlimen Baram, Sharon Leraine Sagan. Sharon, sebaka enggau anak bala orang politik BN Sarawak ti bukai mega, endang siku nembiak ti ampit bulih lisin ngulihka kayu batang beungkus bejuta-juta ringgit ti udah ngujungka pengerusak rampa menua di Borneo.
Cherita dalam The Independent udah nusui enggau silik baka ni kimpin PR ti dipelanja Perintah Sarawak ti udah matih bala ‘Mummy Bloggers’ dikena sida nguji ngangkatka nama menua Sarawak nyadika sebengkah perintah ti balat chakah ngintu pemanah rampa menua iya.
alam sebengkah varisyen ti ngasuh ati geli ba ‘perang cyber’ nya, bala blogger bisi dikangauka nyadi raban Duta ba Kelab Blogger Sarawak lalu sida mega disemayaka penemuai ti pechuma ke menua Sarawak ba pakej nemuai ti diberi nama ‘penemuai bala pengarang berita’.
Tang tebal agi ari bala blogger nya udah matak diri sepengudah sida nemu pekara ti bendar. Lalu demalam, sebengkah ‘pengerami ngelancharka filem’ nya nengeri London baka ti dilanggur nya udah dikinsil.
Agensi berita entarabansa ti tebilang, BBC, udah madahka ngagai Sarawak Report, kaul sida dalam filem ti digaga Ben Fogle nya sebengkah berita bula ti udah ditempa sengapa.
Lalu Ben Fogle diatu udah madahka Independent iya tekenyit bendar ke isi filem ti dibantaika NGO Global Witness pasal ulah jai nerima suap dikereja Taib Mahmud enggau sida sebilik lalu sida sebilik patut nyaut semua “jaku tanya ti serius”.
Isi berita Independent ti silik nya udah muka runding bala pemacha di serata menua UK pasal pekara-pekara pengerusak rampa menua enggau pemerinsa pendiau orang bansa asal Sarawak senutuk enggau maya pemayuh penerang pasal menua Malaysia ti tebal agi dikuasa sereta dikemataka media-media PR ti mar-mar.
Tibak artikel baka ti ulih ditemu dalam internet nya baka tu:
Ben Fogle Dituduh Nguluka Propaganda Dikena Melakangka ‘Pengerusak Rampa Menua’ Di Sarawak
Ben Fogle, siku orang ti ngaga filem pasal pengawa bejalai ngelantangka ati ke Lembaga Dagang Temuai Sarawak ti betopik “Ben Fogle’s Sarawak Adventure” ti endur iya diayanka bemain-main enggau anak jelu mayas lalu nyemerai ba kaki wong di menua nya. Sarawak bisi ikas pengerusak rampa menua ti pemadu jai di Asia lalu ikas nyual kayu batang ke menua tasik iya jauh tinggi ti dibandingka enggau menua-menua Afrika enggau Amerika Latin dipegulaika; Sarawak bisi laluh kampung bungas semina 5% tang ikas ekspot kayu batang iya manggai 25% dalam taun 2010 suba.
Kaul Ben Fogle dalam kimpin PR nya udah ngasuh raban pemantah Perintah Sarawak tekenyit sereta nyima ati. “Ben Fogle nya dipeda nyadika sebengkah buah dam,” pia ku Clare Rewcastle, siku orang ti numbuhka blog Sarawak Report. “Sebarang sapa ti nemu pasal rampa menua endang patut ngelala pekara-pekara ti bekaul enggau pengawa ngeruga rampa menua ngambika dibuka nyadi kebun dandang besai sawit lalu mega pengelandik perintah menua Sarawak bejalaika atur sida”.
Ke semua artikel nya bisi mega nyadika pugu artikel dalam laman web Lembaga Dagang Temuai Sarawak.
“Sebarang sapa aja ti meri sanding penemu ngagai Ben Fogle ti bekereja ke agensi PR dikena ngangkatka pekara pasal rampa menua Sarawak nya nyadika sebengkah buah runding ti manah ti udah ngujungka iya balat nerima bantah,” pia ku Tim Picken ari NGO Global Witness. “Ben Fogle di Sarawak bemain-main enggau anak jelu mayas ti udah nyadi anak patu-balu – Ben udah nerima anak jelu nya baka anak iya empu! Fogle udah besemaya badu agi nyadi tukang gerah ke Sarawak “nyentuk ke aku udah tembu bejalaika pansik ti silik” lalu mega udah meri saut ti lenak pasal “pejalai” iya di menua Sarawak. Fogle udah netapka penemu diri pasal pemanah rampa menua di Sarawak: “Menua nya chukup manah. Aku udah di Sarawak laban ngaga filem ti pandak pasal pengawa bejalai meda rampa menua ke laman web Lembaga Dagang Temuai iya.”
Kenu ku Fogle, iya nadai kala ngena leka jaku “eko-temuai” maya iya ngenang pasal menua Sarawak. “Aku udah midaka entara Lembaga Dagang Temuai Sarawak enggau Taib Mahmud [Kepala Menteri Sarawak]. Hills Balfour udah ngetanka pengawa sida ke menua Sarawak. “Kami ti nyadi agensi PR, tetap bejalaika pengawa kami ngangkatka pemanah Sarawak ke penguntung ekonomi iya,” ku sida. Mishcon De Reya ari kompeni lawyer di London ti ngarika Kepala Menteri Taib Mahmud, udah mansutka sebengkah timbal sida ngagai filem Global Witness nya: “Perintah Sarawak semina ngeluarka lisin enggau chara ti terit,” lalu Kepala Menteri nya “nadai kala minta sebarang bagi tauka duit suap” ari pengawa nya.