Malaysia enggau Sarawak enggau Sabah bulih merdeka nyau deka ba maya ti sebaka.
Reti nya rakyat nya meh orang ti bekuasa lalu bala orang politik ti dipilih sida nyadi menteri nya nyadika orang ti bekereja ke rakyat, baka di menua Britain enggau Amerika enggau di menua-menua demokrasi ti bukai di dunya tu.
Bala orang politik tu nerima gaji ti tetap ninting bulan lalu sida patut ngadang diri deka ditukar ninting lima taun dikena rakyat nentuka sida nya enda ngelusu, saru runding enggau ngereja penyalah makai suap.
Tu meh nyadika siti kebuah menua-menua demokrasi ngatur pengawa bepilih, awakka rakyat ulih enggau chara ti menuku nukar sapa-sapa orang politik enggau orang bukai ti baru sereta regas agi.
Enti rakyat enda kala ngena kuasa sida dikena mechat tuai sida ngena kuasa undi, dia tuai sida deka enda ingatka diri ti nyadi raban orang ti bekereja ke rakyat lalu sida deka ngumbai diri patut majak merintah (nyengkaum bala anak enggau uchu sida ti nangkanka sida).
Sida deka rapa mata lalu mudah kena suap. Udah nya sida ngiga chara dikena sida nambahka gaji bulan sida enggau chara nyalahguna kuasa enggau penuduk sida ti dipechayaka rakyat.
Sida ulih nipu rakyat enggau chara meri ‘pemansang’.
Iya deka ngeluluka diri mai ‘pemansang’, ke terubah iya ngena agih belanja ari perintah menua, udah nya enggau chara ngambi tanah ari orang asal lalu meri duit upah ngagai bala orang ti bekaul enggau iya dikena iya ngulihka penguntung ke diri empu ari tanah nya.
Suah agi enti ‘pemansang’ nya nyadika ketegal endur bala orang politik nerumpak pengeraja ke guna diri empu, pengawa nya deka ngujungka rakyat nyadi makin seranta. Tu meh penusah ti nyadi di bumi Sarawak, ti udah lenyau pengeraja ari rampa menua enggau mega minyak, tang lalu nadai mai penyamai ngagai pengidup rakyat iya.
Enggau nya rakyat di menua-menua demokrasi patut nemu lalu ingatka pengawa ngundi nya siti chara ti manah dikena nukar tuai sida awakka sida ti nyadi tuai nya enda ulih sepeneka ati nabanka pengeraja lalu enda dipechara.
Kelalu malu nyentuk ke sehari tu
Tang suah agi, bala orang politik ti rangka deka ngiga peluang ba pementas rakyat sida ti lalu ngujungka bala rakyat lalu enda meretika kuasa ti bisi ba sida.
Tu meh utai ti dikereja Taib Mahmud dikena iya betan ba kuasa iya dalam pengelama 50 taun sepengudah menua bulih merdeka. Mayuh bala rakyat ti enda selubang penemu ba polisi ti ditumbuhka iya deka dibuai iya ari rintai nama pengundi.Peranak menua sida mega deka diambi pulai ari sida.
Maya umur iya agi biak bendar suba, orang tuai tu bepeluang dipaduka mangku pengawa politik dalam kabinet terubah menua Sarawak lalu iya udah bepagut ba kuasa enggau chara ngelemika undang-undang demokrasi.
Iya udah ngerampas enggau majak ngerampas ngena nama ‘pemansang’ lalu iya udah nyuap sereta mega nipu enggau chara salah-guna semua undang-undang bepilihbesai ti patut iya beresi ngambi ke dikena iya terus bekuasa, awakka iya tau bulih duit beduduk ba bala orang ti seranta di menua iya empu.
Lalu sepemanjai iya bekuasa, rakyat iya mengkang malu sereta bependiau nelap. Sida suah nguji enda mansutka serebana sida. Sida udah enda ingat ke Taib Mahmud nya semina siku orang pengereja pengawa lalu sida udah nejuka iya bependiau baka raja dulu kelia – baka ti dikerinduka iya.
Agi mega Taib Mahmud rindu bendar ngaitka peturun iya enggau raban sultan Brunei (taja pan apai iya semina siku tukang kayu di Miri), lalu enggau nya iya belabuh pechaya ke diri empu nya ulih bependiau baka siku sultan lalu ngerusak kuasa-kuasa demokrasi rakyat di menua iya empu.
Tang diatu udah datai ba maya rakyat Sarawak begunaka penemu ti endur pemerinsa ti nuntung sida nya patut diketuka.
Dalam pengelama 50 taun sida meratika tanah sida dikeruga lalu dirampas, lalu sungai sida nyadi kamah, ti endur ikan, burung enggau jelu babas nyadi pupus. Tang diatu, enggau pengeraja asal dalam kampung enggau tanah majak kurang sida belabuh nemu, sida enda tau enda angkat lalu betindak.
Lalu sekumbang Taib Mahmud begigaka chara nambahka pengeraja iya, enggau chara ngaga tekat hidro lalu berampaska tanah orang bansa asal, mayuh agi rakyat diatu nyau nemu mansutka jaku ‘anang’ ngagai iya. Sida enda agi malu lalu mega enda agi nelap, lalu sida belabuh ngena kuasa demokrasi sida nyadaka nyawa sida.
Enggau nya, enti rakyat bisi kuasa, sapa ti bisi kuasa nutup mulut sida ngambika sida enda ragak? Sapa ti bisi kuasa deka nagang sida begelumu enggau chara ti manah sereta bebaika pelekat enggau kain rentang? Sapa ti bisi kuasa nagang sida begelumu lebih ari tiga iku ti enda tau madahka ngena siti sada lalu ngumbai Taib Mahmud enda bulih sukung penuh ari rakyat iya?
Di Miri ba minggu tu tadi, seraban rakyat datai mantah penemuai Taib Mahmud ba nengeri nya. Nama kebuah enda tau?
Dulu suba sida takut ngereja pengawa nya, laban bala orang penerit undang-undang seruran madahka sida pengawa ngayanka bantah ngagai BN nya deka dikumbai ‘munsuh menua’. Tang diatu rakyat udah mupuk ngelala jaku nya sebengkah peluang ngambika rakyat enda ibuh, laban rakyat udah dipampas ngena demokrasi 50 taun tu udah lalu sida nya meh ti bekuasa.
Ke bendar iya, munsuh menua nya bala orang politik ti seruran ngiga peluang ngenchuri kuasa ari rakyat enggau undi demokrasi, sereta mega enggau tanah-tanah sida.
Nya kebuah di Miri, bala orang ti ngayanka bantah sida enda nerima penemuai Taib Mahmud tang sida mansutka jaku tanya sida, nama kebuah nyentuk ke diatu sida lalu bedau diberi kad pengelala diri enggau kuasa dikena sida ngundi? Sida mega deka nemu nama kebuah pengereja pengawa ari menua bukai mudah bendar bulih kad pengelala nyadi peranak menua tu, amat meh sida besemaya sida deka ngundi BN?
Rakyat di sitak Baram mega mantah projek ngaga tekat-tekat hidro ti diperambuka ba menua sida enggau nadai meri kebuah ti silik tauka runding-chara ti nyengala.
Jaku-jaku bantah baka nya endang patut ba undang-undang lalu Taib Mahmud patut napi bantah-bantah nya. Pia mega, iya patut napi jaku bantah bala orang maya iya nemuai ke Long Lama di sitak Baram beberapa hari tu udah.
Dulu suba, rakyat deka ngendukka pala sida, lalu betempik jari enggau naka penginggar lebuh siku’Raja Pala Burak’Sarawak nya datai nemuai ngagai menua sida. Tang diatu sida udah mupuk-mupuk leju sereta enda rinduka iya, lalu sida bisi bendar ati deka ngelabuhka orang tuai ti rangka sereta udu nipu nya.
Enggau nya, nama agi chara bukai Taib Mahmud deka nemuai ngagai sesebengkah menua enggau enda dikemaruhka, tauka dikeleseka? Saut iya, engka enda.
Tang nya enda ngawa. Orang tuai tu patut udah ngelala reti demokrasi ti bendar sebedau iya ninggalka opis iya!
