Ba ujung minggu tu tadi Opis Komisyen Penagang Penyalah Makai Suap Malaysia (MACC) bisi madahka sida bisi bulih mayuh bendar penerang enggau saksi bekaul enggau penyalah makai suap ti dikereja Taib ti “manchal sereta enda lurus ati” nya.
Lekajaku nya sekeda ari lekajaku ti tebilang disebut Taib dikena iya ngeleseka opis komisyen nya lebuh iya ti ditanya bekaul enggau penyalah makai suap ti dikereja iya ba menua ti diperintah iya.
Ba sebengkah jaku randau enggau pengarang berita, pengari MACC Lim Bee Kean madahka kebuah tuai menua ti kleptokrat nya enda ditangkap lalu enda didawa laban sida diatu benung ngumpul penerang enggau saksi ti ngujungka sida ngena maya ti kelalu lama!
Diatu bala pemansik dari opis MACC nya udah ngamatka pansik sida nya benung chakah dipejalaika ba semua penerang enggau saksi ti diterima sida lalu sida madahka diri endang amat bebendar ngereja pansik nya.
Endang udah suah dipejalaika di menua-menua ti maju, lebuh siku-siku tuai menua dituduh lalu dipansik sekumbang iya mangku pengawa, iya enda tau enda nyurutka diri dulu nyentuk ke iya nadai ditemu salah.
Endang mar bendar diterima akal enti nuan mengkang bekuasa tang undang-undang menua deka mansik nuan ti dituduh ngereja sebarang penyalah.
Tang kami berandauka pasal perintah BN ti udu korup enggau mega pasal Tuai Apek Bayat Kayu Batang Sarawak. Kelimpah ari ti meri kereja sama ngagai MACC ti deka mansik iya, Taib madahka bala pemansik nya “manchal sereta enda lurus ati bejalaika pengawa” lalu sida “enda patut bulih kereja sama” ari iya.
Ba ujung minggu tu tadi raban pemansik ari MACC enda meri komen ti panjai sekali ke Taib Mahmud deka besetuju dipansik tauka enda.
Nadai taring
Taib nemu iya ulih nyeliahka diri ari kena tangkap seraya iya ti nuduh kuasa undang-undang nadai ngarika iya laban iya agi bepagut ba politik.
Najib Razak pan agi mengkang ba pengawa iya, laban disukung bepilihbesai ti ngelakar di Sarawak enggau Sabah. Menua-menua di semenanjung endang endur BN chakah bendar ngelakar enggau terang.
BN udah ngelakar enggau mayuh macham chara maya bepilihbesai tu tadi, nyengkaum salahguna kuasa enggau penuduk sida ngambika sida ulih mengkang bekuasa.
Diatu BN chakah ngatur singkang sida dikena sida ngulihka untung ari tabung menua ti dijaga sida.
Taib endang nadai ditemu deka nyurutka diri. Iya deka mengkang nyadi tuai apek bayat lalu bebula semua kuasa undang-undang nyentuk ke maya iya ti pengabis ila.
Tang, sebarang sapa samseng pan deka putus asa lalu timpuh sida deka abis, lalu Taib mega enda dikelaungka.