Enti nuan nerima gaji ti kelalu besai lalu bejaku besai pasal “Kuasa Elektrik Ke Pengawa Pemansang” Sarawak, nuan enda patut meri dalih pasal pengerugi bejuta-juta dollar.
Kebuah baka nya laban ba minggu nyin kemari penanggul ba kuasa elektrik ti nyadi di serata menua Sarawak udah ngerusak pengarap mensia mayuh ba Kepala SEB, iya nya Torstein Dale Sjotveit.
Bekal kuasa elektrik ari tekat besai Bakun udah rusak lalu ngujungka penanggul di sepemanjai tali bekuasa tinggi ti enda chukup nampung bekal kuasa.
Penanggul kuasa elektrik nya ukai semina nyadi dalam pengelama lebih lapan jam, tang penganggul nya udah ngemuntanka indu perambu SEB ti deka ngeregaska atur pengawa industri ti besai-besai di menua Sarawak
Perengka ti udah rusak laban penanggul nya sebuah ari indu projek SCORE, iya nya kilang pengelebur aluminium enggi kompeni Mukah Press Metal.
Indu perengka dalam kilang nya, ti udah tekelalu angat ari ngena kuasa elektrik ti tinggi dikena ngelebur aluminium nya, udah enda mukai-mukai lalu nyadi chelap sereta meku ba proses ti enda ulih ditikalka. Beduduk ba penanggul nya, kilang nya lalu ditutup dikena meri awak ke pengawa nukar perengka ti udah rusak nya.
Torstein bisi didinga udah mansutka jaku tinggi pasal “mekal kuasa dikena nyukung pemansang”, pemuntan iya udah mai pengerugi ba pengawa beranakka puku dagang beratus juta dollar!
Sebaka enggau ulah bala pemesai bank dalam Wall Street, CEO kompeni SEB ti seruran besai jaku nya deka majak madahka tanggung pengawa iya dalam kompeni SEB nya endang senutuk enggau gaji iya ti besai ari ti patut nya.
Tang, sapa agi orang bukai ti setuju?
‘CEO’ Sarawak ti patut bempu tanggung pengawa
Raban pemesai dalam kompeni Mukah Press Metal udah nguji enggau naka ulih dipeda positif ba penanggul kuasa elektrik nya. Tang sida enda tau enda “ngaku pengawa dalam kilang sida nya dituntung penanggul dalam pengelama lebih kurang enam bulan, ti disadang deka nanggul penatai penguntung sida ba taun ti terubah”.
Dikena sida ngulihka ati bala orang ti beranakka puku dagang ti endur sida madahka sida ulih minta tanggung ganti rugi ari kompeni insurans, Press Metal tetemuka pengerugi sida nya manggai RM100 juta ketegal penanggul nya.
Enggau penanggul kuasa elektrik nya, kompeni insurans ngasaika sida mar bendar deka nerima penanggul nya lalu sida tentu deka betanyaka penyikar tanggung pengawa raban pengurusan dalam SEB ti betuaika Torstein nya.
Bala orang ti beranakka puku dagang mega tentu deka meri timbal ti enda inggar dikena sida meransang pengawa “nyual pulai” syer-syer sida ti deka dituntung pengerugi udah bekau penanggul kuasa elektrik nya.
Ke penudi iya, jaku kutuk enggau jaku ransi bala orang ba pengawa ngerua asil enggau kurang penyikar nya tentu deka ditujuka ngagai siku orang ti bempu tanggung pengawa penuh bekaul enggau strategi pengawa industri enggau atur ti mayar gaji Torstein ti kelalu besai nya, enggau nadai ngengah proses ti nengkeman tauka nyengala.
Orang nya Kepala Menteri Sarawak Abdul Taib Mahmud, ti udah raun ke menua tasik. Taib dipeda enda ngiji ketegal napi pengerugi RM100 juta ti dibai penanggul kuasa elektrik ti udah nuntung menua iya empu nya, ti balat ngeruga pengidup bala rakyat iya.
Model ti salah enggau pengurusan ti salah
Taja pan baka nya, tu nyadika sebengkah tampar ti udu ngagai Taib Mahmud ti ngumbai diri empu CEO pemadu mujur ke menua Sarawak.
Penanggul ba projek besai ti dikerinduka iya nya mai reti penanggul pemadu besai ngagai pengawa industri, baka ti dikamatka penanggul perengka kilang di Mukah.
Tu mih ketegal nama kebuah jaku jurai, jaku kutuk enggau jaku bantah mensia mayuh Sarawak endang begunaka pemansang ti sensitif ti deka meri penguntung ke bala rakyat ba ikas pun dalam komuniti.
Kelimpah ari ti ngaga tekat ti besai-besai, manah agi menua pesisir diberi projek tekat ai ti mit ti dipeda ulih dikena ngubah pengidup bala orang – jauh murah agi digaga sereta mudah agi dikemataka.
Berapa pemayuh projek tekat ti mit-mit ulih digaga ngena ungkus beratus juta ringgit, tang duit ti nyampau nya udah lenyau dalam pengerugi ketegal penanggul ti udah nyadi tu tadi? Ni pemayuh agi tekat ti mit-mit ulih digaga ngena bebillion-billion ringgit nyadika ganti tekat Bakun?
Tang bala rakyat di menua pesisir di serata menua Sarawak udah diberi tangki ai plastic dikena nimbun ai ujan dikena sida nyumai enggau ngena ai parit tauka ai sungai ti udah kamah.
Torstein Dale Sjotveit enggau tuan iya ti ngembuan penemu enggau ulah megalomanik nya patut ngetu ngemesaika ‘atur pemansang’ seduai ti udah tinggal jauh di belakang nya sebedau sebarang penanggul ti besai ungkus nyadi baru ti deka ditanggung bala orang pemayar chukai.