Lebuh maya berita ti bisi ditusui ba ujung minggu tu tadi lebuh Sarawak Energy belabuh ngisi Tekat Murum enggau nadai pemendar ari orang bansa asal di menua nya, mayuh agi ari bala sida nya benung nirika empang jalai, lalu kami bisi mega ngeluarka jaku gerah ari Bruno Manser Fund ti madahka sida udah milih kompeni Sarawak Energy nya nyadika penerima “Perais Mata Mensia Mayuh” di Davos nyadika kompeni pemadu jai di dunya ke taun tu.
Berita nya ditemu berebak enggau sebengkah berita ti madahka sebuah rumah panjai raban bansa Penan ti bisi bekaul enggau pengawa nirika empang jalai udah mega ditunu orang ti enda dikelala beberapa hari tu udah, ti ngujungka pengidup sida nadai temu tuju.
Radio Free Sarawak udah ngeluarka sebengkah pasal pekara tu lalu Sarawak Report deka nyidi pengerembai berita tu ti udu ngeruga pengidup enggau pendiau raban bansa asal di Sarawak nya.
Jaku gerah ari Bruno Manser Fund
Penyarut ba pengelantang mensia lebuh pengawa ngisi tekat ti ngerusak genturung pendiau raban bansa Penan – Long Wat ditunu orang enggau sengaja.
(BASEL, SWITZERLAND / KUCHING, SARAWAK) kami udah nerima sebengkah berita ti udu ngenyinuka ati ari menua Sarawak, Malaysia ti madahka kompeni tunggal pengeluar kuasa elektrik di Sarawak, Sarawak Energy Berhad, udah belabuh ngisi tekat Murum 944MW di Sarawak enggau nadai meri sebarang jaku gerah tauka notis ngagai enam bengkah genturung pendiau orang bansa asal Penan di Long Wat, Long Luar, Long Tangau, Long Menapa, Long Singu enggau Long Malim. Nitihka perang ari raban orang bansa asal nya ti ditanya gerempung SAVE Rivers ari menua Sarawak, pintu ai ari lubang baruh tanah udah ditutup kena malam hari Enam tu tadi. Lebih 100 iku bansa Penan benung bejaga ba tapak empang jalai tama ngagai tapak projek tekat ai nya.
Kami mega dipadahka berita pasal sebuah kampung bansa Penan di Long Wat udah angus ditunu enggau sengaja, dipelabaka dikereja bala orang ti diupah Sarawak Energy Berhad. Raban bansa orang asal di menua nya udah ngerepotka pengelenyau beberapa buah perau sida ketegal kena teruju arus deras ari pengawa ngisi tekat nya. Dipelabaka enda kurang ari 1500 iku bansa Penan enggau 80 iku bansa Kenyah udah lenyau endur sida diau ketegal pengawa ngisi tekat Murum nya ti deka endur 24,000 hektar tanah kampung deka ampuh laban ai tekat.
Bruno Manser Fund udah ngansak Pelapor Khas ke Penetap Kuasa Pengelantang Orang Asal Entarabansa Gerempung Bansa, James Anaya, ngambika masuk champur enggau perintah Malaysia ngetuka pengawa ngisi tekat Murum nya. Komuniti entarabansa diatu udah ngansak Menteri Besai Malaysia Najib Razak ngetuka pengawa ngelanggar atur pengelantang mensia di menua Sarawak lalu mutarka semua penanggul ti nuntung raban bansa asal nya.
Projek ngaga tekat Murum nya sebuah ari dua belas buah tekat ti dilanggur digaga perintah menua Sarawak ti deka ngeruga pendiau enggau pengidup bepuluh ribu iku orang bansa asal ti nguan rampa kampung ujan Borneo. Tekat Baram aja ti udah diperambu nya disadang deka belabuh digaga sepengudah tekat Murum nya tembu digaga, ti deka muru enda kurang ari 20,000 iku orang bansa asal pindah ninggalka genturung pendiau sida. Beratus-ribu batu pesegi rampa kampung ujan enggau tanah di endur nya deka diampuhka ai tekat nya.
Semanjai pengawa ngaga tekat Murum nya ti bisi bekaul enggau penyalah-penyalah ti mar bendar digambarka ba dini-dini endur di menua di luar Sarawak. Pengawa ngaga tekat Murum nya dibalut resia sebedau repot dikeluarka bekaul enggau empas projek ngagai rampa menua enggau sosial (EIA). Mayuh agi ari kontrak awam projek Murum nya udah diberi ngagai kompeni-kompeni ti bisi kaul enggau Kepala Menteri Sarawak Abdul Taib Mahmud, baka kompeni-kompeni Naim Candera, Cahya Mata Sarawak enggau Sarawak Cable.
Pengawa ngaga tekat Murum nya tentu enda ulih mujur enti enda dibantu bala jurutera enggau pengurus ari menua tasik. Jurutera Andrew Pattle ari kompeni Hydro Tasmania udah diinjau bekereja nyadi pengurus projek ngaga tekat nya. Torstein Dale Sjotveit, siku peranak menua Norway dipaduka nyadi CEO dalam kompeni Sarawak Energy Berhad. Sjotveit suah bendar udah dituduh ketegal nyukung pengawa makai suap sida Taib sebilik lalu udah direpotka bala aktivis rampa menua ngagai opis SPRM. Gerempung Bruno Manser Fund deka ngeripotka semua kompeni menua tasik, bala jurutera enggau pengurus sida enggau mega perintah menua Sarawak ketegal ngelanggar atur pengelantang mensia bekaul enggau pengawa ngaga tekat nya.
– Abis –
Penerang ti silik bekaul enggau pengawa ngaga tekat di Sarawak enggau penyalah makai suap, tau dipeda ba laman web kimpin kami dikena ngulihka repot-repot ari gerempung Bruno Manser Fund:
– Sold Down the River. How Sarawak Dam Plans Compromise the Future of Sarawak’s Indigenous Communities (2012)
– Complicit in Corruption. Taib Mahmud’s Norwegian Power Man (2013)
www.stop-corruption-dams.org/resources
Penerang ti silik ari menua Sarawak empu tau ditanyaka ari Peter Kallang, pengerusi gerempung SAVE Rivers di menua Sarawak ba lumur 6013 833 11 04
Bruno Manser Fonds
Socinstrasse 37
4051 Basel
Switzerland
www.bmf.ch
41 61 261 94 74