Kepala Menteri Sarawak Abdul Taib Mahmud rindu bendar ngenang mimpi manis iya dikena iya bebula pasal pengerusak kampung di menua Sarawak. Bala penyukung iya mega seruran nyikap diri deka besetuju enggau jaku iya nya.

Ambi ke banding, bedau tentu lama dulu ari tu orang tuai nya udah madahka agi bisi 70% laluh kampung Sarawak nya kampung bungas lalu kandang menua ti bukai nya udah tumbuh kampung ti baru, ti ditanam baru!

Suratberita Borneo Post (ti enggi kompeni KTS kroni ke Taib Mahmud lalu mega enggau menyadi iya empu, YB Ali Mahmud) kala nuliska repot ti mar bendar dikarapka ti madahka jaku tuduh ngelaban Taib sebilik ti berusakka rampa kampung di Borneo nya ukai pekara ti bendar.

Tang tiap iku orang raban bansa asal ti diau di menua pesisir di Sarawak ngelala sereta nemu tuai menua sida nya mantaika pemula laban kayu kampung ti udah lenyau (semina enti nuan ngitung pun sawit ti mai pengamah ke rampa menua nya, ti endur bala tuai BN aja ti ngumbai kebun sawit nya sebaka enggau ‘kampung puang’).

Pengamat

Enggau nya Sarawak Report udah nyelak baru penerang ti bepelasarka asil pansik saintifik bala orang ti landik sereta bisi tanggungpengawa ti berat, awakka dikena meri timbal penemu ngagai ‘mimpi manis’ Kepala Menteri ti rindu bendar ngemanahka diri empu nya.

Rampa kampung Borneo ke bendar iya napi pengerusak ti balat bebanding enggau utai ti ulih diperagamka kitai, nitihka bala pemansik, ngerusak daya serap karbon ba sebengkah menua pulau di Malaysia.

Seraban pemansik nya datai ari tiga buah university udah mujur ngena teknologi gambar satelit dikena sida mansik rampa kampung ari langit. Sida tetemuka 80% ari rampa kampung nya udah balat bendar rusak ketegal pengawa ngulihka kayu batang, lebih agi dikena ngulihka kayu batang engga mega endur muka kebun dandang besai sawit.
Gambar satelit bekualiti tinggi ti dikeluarka CLASlite Satellite System nya, ti udah dikemansangka Greg Asner enggau raban iya ba Carnegie Institution for Science, mantaika berapa pemesai rampa kampung ti ditujah jalai dikena orang ngulihka kayu kampung di menua Sabah enggau Sarawak, lalu selampur menua nya bisi 26% ari rampa kampung ba pulau Borneo nya.

Philip Shearman, ti sama bisi nuliska asil pansik nya madah ngagai RTCC, “Kami bisi tetemuka semina mimit aja kampujng ujan ti bedau dikeruga ba menua Sabah enggau Sarawak – kami belabaka semina 22% ari rampa menua di Borneo Malaysia nya agi bisi kampung bungas, lalu kampung nya disadang nyadika kampung galau.

Ngelepaska karbon

Sama sebaka enggau pengawa ngulihka kayu batang ti enda meruan belama-lama, kampung di Malaysia dituntung pengerusak ti udu, nyengkaum pengawa ngulihka asil kampung enggau tama ke dalam kandang kampung ti salah ba undang-undang. Ikas pengerusak kampung nya jampat agi bebanding ke enggau ba menua tropika ti bukai, lalu entara 1990 enggau 2010, menua nya lenyau 8.6% tauka 1,920,000 hektar kampung penutup bumi iya.

Pengawa nebang kampung enggau enda betagang udah ngelepaska gas karbon ti kelalu mayuh ngagai ruang angin, sekali ke chara terus tauka enda chara terus. Mayuh agi karbon dalam kampung disimpan dalam gumpal daun kayu, lalu pengerusak ba kayu ti bukai sereta mega keruga ba gaya tanah mega ngelepaska gas karbon ngagai ruang angin.

Tu udah ngujungka pengawa ngeluska beberapa iti kandang kampung, lalu nejuka iya rangkai, kusi sereta mudah bendar diempa api, ti mega nyungkak pengeluar gas karbon ke dalam ruang angin. Chara tebang-enggau-tunu ti dikena ba pengawa muka kebun dandang besai di Sumatra, Indonesia nya udah ngenataika penanggul angus kampung di menua nya dalam pengelama beberapa bulan ti udah ngujungka pengamah angin ti pemadu jai ti kala direkod.

Gaya jalai dalam kampung udah ditemu bala pemansik nya, balat nuntung kandang kampung ti suah ditebang dalam timpuh ti pandak. Pusing tebang di menua Malaysia, kenu ku Shearman nya, kelalu pandak endur ngawakka pengeluar karbon ti bekandang dalam kampung, lalu udah nya ngujungka pengelenyau mayuh agi karbon.

Penanggul tu ukai semina naka proses pengeluar karbon aja. Pengawa nebang kampung mega balat ngeruga pengaya biodiversity ba sesebengkah rampa kampung, lalu mega ngeruga pengidup raban bansa asal Penan ti diau dalam kampung di menua Sarawak.

“Tebal agi rampa kampung di Sarawak udah ditebang, dalam penyuah lebih lima kali. Bala tukang tumbang ngena chara nebang bepilih-pilih ti endur sida belabuh ari pun kayu ti udah besai sereta tuai bendar, udah nya sida deka datai kia baru napatka lalu kayu ti mit-mit,” Sophie Grig, siku orang ti bekereja ba Survival International, bejuang ke nasib raban bansa asal, madah ngagai RTCC.

Sekeda ari raban bansa asal ti diau dalam kampung ngasaika kampung sida suah bendar ditebang datai ke tujuh kali, nyentuk ke nadai agi repik kayu ti tinggal endur sida beridup. Lebuh pengawa nebang kampung dikereja, kanopi puchuk kayu deka tebuka lalu udah nya tanah tumbuh rumput enggau anak kayu ti baruh. Ba raban bansa Penan, sida nya enda ulih idup enti nadai kampung lalu empas penanggul nya balat diasaika sida.”

Enggau chara ngetuka pengawa nebang kayu, sinki endur ngalau karbon deka nyadi; enggau chara teori, kampung ti udah ditebang deka nelesak baru dalam pengelama 50-100 taun. “Enti ditejuka tumbuh baru, pun kayu ti tuai sereta besai-besai nya deka nyintak karbon ari angin, lalu tanggungpengawa kampung Borneo Malaysia ulih mulaika pemanah kampung enggau ubah gaya hari,” ku Shearman.

Kebun sawit

Pejalai meraka garis entara menua ngagai Brunei enggau bida ti kelalu berupai, bisi 54% ari kampung menua nya enda dikeruga pengawa ngulihka kayu batang baka di Sabah enggau Sarawak.

“Iya jauh bendar bida,” pia ku Shearman madah ngaga RTCC. “Nyau deka selampur kandang menua Borneo Malaysia udah ditujah jalai orang ngulihka kayu kampung, tang rampa kampung di menua Brunei agi mengkang besai.”

Tu engka laban bisi pengingin ke pengawa ngintu kampung laban batang ekonomi Brunei lebih agi ba pengawa ngulihka minyak enggau gas asal. Ekonomi di Malaysia enggau Indonesia balat bepanggai ba sawit; nitihka asil pansik dalam Jurnal Ekonomi Industri Sawit, pengawa ngeluarka sawit sida enti dipegulaika sekali meri 87% ari pengeluar sawit dunya dalam taun 2007 lalu 91% ba pasar dunya.

“Semina mimit aja rampa kampung agi tinggal di menua Borneo Malaysia, laban udah mayuh bendar kampung suah ditebang lalu udah nya dibuka nyadika kebun dandang besai sawit,” ku Jane Bryan, siku tua raban projek nya. “Kampung nya dulu menya mayuh bendar kayu ti besai-besai, lalu besai bendar guna iya ngundan karbon sereta nyukung system ekologi kampung, tang diatu semua nya udah bebali nyadi kebun sawit, tauka semina ditejuka baka nya aja.”

Diatu menua Brunei duduk ba tangga lumur tiga puluh ba Indeks Pemansang Mensia Serakup Bansa-Bansa Besatu, lalu menua Malaysia ba ikas lumur 64. Shearman pechaya penuduk nya dikeruga pengawa ngulihka kayu batang. Ba pengawa pemansang mensia, “Kitai pechaya penuduk nya agi bisi peluang ti besai.”

– Tau dibacha enggau silik ba: http://www.rtcc.org/2013/07/18/80-of-malaysian-borneos-rainforests-destroyed-by-logging/#sthash.BD0Fssyj.DYUq277w.dpuf

Time KTS enggau Ali Mahmud udah nuliska pekara tu dalam Borneo Post dulu suba!