Seraban orang bansa asal di Murum madahka sida kena keduan siku orang ari menua luar, lalu udah nya sida ngaga sebengkah repot polis dikena ngelaban iya.
Torstein Dale Sjotveit nya siku orang bebansa Norway, ti udah ngujungka orang bansa asal ngaga mayuh macham repot udah bekau iya merak sida enggau jaku anu ba mua orang bansa Penan, ti diburu iya pansut ari menua asal sida empu.
Iya mega bisi ngumbai seraban polis nya orang ti ‘penakut’ laban sida udah enda berani ngambi tindak ba raban bansa Penan ti ngelaban iya nya.
Orang luar bebansa Norway nya ti nyadika tuai dalam pengawa ngaga tekat-tekat hidro ke Taib Mahmud nya benung nerima gaji lebih ari satu juta dollar ba mata duit USD, ti udah nya iya ngumbai diri bejaku ngarika kompeni Sarawak Energy.
Nitih ke sekeda repot ti bisi diterima, bala pengari ke raban bansa Penan, ti ngayanka bantah sida ba tapak endur ngaga tekat Murum, madahka sida udah diasuh nepan kerita SEB ti mai sida ba penyauh beberapa batu ngambika betemu enggau CEO bebansa Norway nya, ti udah badu bejuraika sekeda pekara, endur iya lalu merak sida enggau jaku anu.
Udah bekau iya nganu sida enggau seraban polis di endur nya, iya lalu ngasuh sida pulai bedarat, ti kenu ku sida nyadika sebengkah ‘ukum’ ke sida ti ngelaban langgur pengawa ngaga tekat nya.
Bala pengari Penan ti ngaga repot polis nya udah madahka sida nadai kala diasut sapa-sapa ‘pengasut ari menua luar’.
Lalu sida mega bebulaka asut orang ari menua luar nya disukung kepala penyakal PKR, siku lawyer kuasa pengelantang raban bansa asal Baru Bian, ti minta kepala dalam SEB bebansa Norway nya enda patut ngambi bagi diri dalam sebarang pekara ti bekaul enggau pengawa perintah ti bisi kaul enggau raban bansa asal.
Baru Bian udah nangkan Sjotveit ngambika iya enda ngambi bagi ba pekara kuasa pengelantang orang asal enggau pekara-pekara pasal bayar pampas, ti endang sebagi ari tanggungpengawa bala menteri perintah.
Beserimbai enggau nya, raban NGO entarabansa enggau mega Sarawak Report udah suah bendar madahka raban bansa Penan nya udah balat disiping Sjotveit enggau tuai iya, Kepala Menteri Sarawak Taib Mahmud.
Pengawa ngaga Tekat Murum nya udah ngelanggar tiap ikas atur pengawa ti endang ditetapka, baka ti ditetapka Gerempung Pengeluar Elektrik Hidro Entarabansa (IHA), ti endur Sjotveit udah ngarika menua Sarawak ti nyadi kaban ba IHA nya.
Projek nya udah belabuh dikereja enggau chara resia, enggau nadai sebarang kes ti ngemendarka keruga atas laluh kampung di Borneo, ti endang ditinggalka awakka meri penguntung ke Taib Mahmud.
Nyau datai ba maya pengawa ngaga tekat nya deka ditembuka, nya baru asil pansik empas ngagai rampa menua enggau sosial nya dikeluarka.
Nyerumba pendiau enggau ulah sumbung Torstein, ti nyadi kepala dalam Sarawak Energy, iya udah meri arah ngambika tekat nya diisi ai, sekumbang orang bansa Penan benung ngayanka bantah sida ba pekara bekaul enggau bayar pampas.
‘Pampas’ ti nyelai sereta ngeligi ti dilanggurka ba raban bansa Penan, nya endang sebagi ari Langgur Pengentap Pendiau (RAP) ke menua Murum, ti udah ditiriska perintah Taib Mahmud baka ti kala udah dichelak lalu dikeluarka Sarawak Report dalam taun nyin kemari.
RAP nya udah ngayanka reti ti bendar baka ni Perintah Sarawak udah enda ibuh ke raban bansa asal dalam pengelama 50 taun, beserimbai enggau bala tukang tumbang ti ngerusak rampa kampung endur orang bansa asal nya ngasu-beburu lalu udah nya muka kebun sawit bedandang besai ti udah nya mai pengamah ngagai sungai di endur nya.
Pengawa muka kandang rampa menua dia, ti dikereja bala orang ari menua luar ngena nama ‘pemansang’ nya udah nadai mai sebarang penguntung ke orang bansa asal di menua nya, 40% ari bala nembiak di endur benung dituntung penanggul kurang pemakai ti manah lalu 100% ari sida ti besai tuai di endur nya nadai ngembuan pelajar, nitih ke repot, ti ditemu deka dipelalaika perintah menua.
Nadai siti pan jaku-jaku semaya SEB nya udah dikamatka.
Enggau nya, nama kuasa Torstein ti begaji besai bendar nya nangkan “madahka pengasut ari menua luar enggau raban NGO ti ngelaban perintah enda ulih mantu kita, lalu sida endang enda ulih mantu kita”?
Sjotveit semina ngeluluka diri sinu ati ke nasit jai ti nuntung raban bansa asal ti kena keruga misyen iya.
Tang iya enda kala mansutka pengerindu iya ba penanggul ti nuntung bala orang bansa asal laban iya lantang bendar ati nerima gaji bulan ti besai bendar.
Diatu udah mayuh bendar orang menua luar udah tama ke dalam rampa kampung enggau menua ti dulu suba nya endang kampung bungas ti endur raban bansa Penan enggau Kenyah Murum diau.
Tang bala orang ari menua luar nya ukai ngarika sebarang raban tauka gerempung NGO tauka sapa-sapa blogger ti ngatika diri. Sida semina seraban pengereja pengawa ari menua luar ti diupah Sarawak Energy ti dibai ari menua China enggau Indonesia, Myanmar enggau Pakistan ngambika ngeruga rampa kampung lalu nirika Tekat Murum.
Bala pengereja pengawa ari menua luar nya udah mai penanggul ngagai raban bansa Penan, ari ti tama genturung pendiau Penan dia. Sida nya mega dibayar upah bekereja ti mit bendar, baka ti ditusui sekeda ari bala sida ti lari ari Murum nya.
Enggau nya, ari ti nuduh bala pengasut ari menua luar ketegal ngerachun penemu enggau runding orang ti empu menua di Murum dia, kami deka nanya ngagai Sarawak Energy, nama kebuah sida enda chakah mantu orang bansa asal dia enggau chara meri pelajar ti chukup tauka meri pengawa ti ulih dikereja sida, udah bekau tanah enggau kampung sida kena keruga kerita lipan enggau lori, ti diatu udah ngujungka menua sida deka diisi ai tekat?
Surat-surat penerang RAP nya ngundang penerang ti madahka mayuh agi bala orang bansa asal di endur nya enda direjista pengada sida, enda digagaka kad pengelala tauka direjista nyadi pengundi, taja pan sida udah balat bendar dikeruga kuasa Torstein – lalu taja pan iya udah balat bendar ngutuk sukung orang ari menua luar ti mantu bansa Penan angkat ngelaban iya!
Diatu Sjotveit benung napi penanggul enda ulih dikarapka dalam pengawa iya ngeluarka kuasa elektrik hidro di Sarawak.
Penanggul-penanggul ba system kuasa elektrik udah nyadi enggau enda mukai-mukai udah bekau iya besambungka grid kuasa di Sarawak enggau Tekat Bakun ti udah ngujungka pengerusak pemadu besai ba sebengkah palan pengelebur aluminum ba kandang SCORE. Pengawa ngeluarka aluminum di Mukah nya udah balat rusak sereta meku, ti udah ngenataika pengerugi beratus-juta ringgit.
Enggau nya, sekali ke Torstein patut numpuka tinjau enggau runding iya ba ‘pengelandik’ iya mutarka pengawa ti endang ungkup iya, ari iya ti beduan sereta meri jaku tangkan ngagai orang bansa asal baka ni sida patut ngaduka pengidup sida?