Ba ujung minggu nyin kemari Taib Mahmud udah ngereduas ketegal ‘pekara ti nyadi udah dikemesai-kemesaika’ di menua Sarawak ti udah mai perening ti enda manah ba perintah menua ti betuaika iya.
Enggau nya, terang bendar iya enda rinduka pengawa beduan raban bansa Penan ba tapak Tekat Murum nya dikemesai-kemesaika sekeda media.
Raban bansa Penan nya mengkang ngayanka bantah sida ngagai arah perintah kukut-besi iya berebak enggau pengawa ngisi tekat Murum sepengudah bayar pampas nya disetujuka tauka jaku-jaku semaya perintah dikamatka.
Tang seraban bala pemerati ti baru pulai ari endur nya udah bekau sida betemu enggau raban bansa asal ti kena keduan nya, ti enda nginsit ari tapak endur sida nirika empang jalai, taja pan endur nya bisi dilawa seraban polis ti disikap enggau senyata lalu nangkap siku ari tuai sida ba minggu nyin kemari.
Repot nya madahka orang bansa asal ti kena keduan nya, sama enggau bala sida ti indu enggau nembiak mit sanggup diau dalam langkau arau ti didirika sida sebelah tisau jalai, tang pengeliat ati sida endang tetap dikena ngelaban pemingkuk atur perintah.
Raban bansa Penan nya sebengkah raban orang asal Asia ti penudi ti mengkang idup enggau chara pindah dalam kampung lalu berebak enggau nya tuai ti bekukut-besi nya seruran ngumbai raban bansa nya kelalu primitif sereta patut diburu pansut ari rampa kampung sida ti ditebang iya.
Tang raban bansa Penan nadai bulih sebarang penguntung ba ‘pengawa pemansang’ ti dibai nengah pengawa ngulihka kayu batang enggau bebukaka kebun dandang besai ti endur raban bansa nya udah mutuska penemu sida enggai besenutuk penemu enggau iya.
Sekumbang Taib enggau sida sebilik ti chakah ngulihka pengeraja bejuta-juta ringgit, tang raban bansa Penan nya lalu nadai bulih sebarang penguntung ari perintah kelimpah ari sida ti meratika kampung sida nyau abis ditebang, nitihka asil pansik kompeni Sarawak Energy empu.
Lalu pemutus runding perintah menua deka ngisi tekat Murum nya deka meri kuasa elektrik hidro ti belebih di menua nya lalu berebak enggau nya perintah nadai ngayanka sebarang chara dikena ngangkatka pemanah pendiau enggau pengidup raban bansa nya.
Lebih agi, nadai sekula, enggau klinik tauka perengka beguna ti bukai udah digaga ba ‘palan pengentap pendiau ti baru’ ke orang bansa asal ti dipindahka nya, lalu sida diasuh belajar ngidupka diri enggau chara betanam-betupi (ngena duit pampas ti enda lama lalu penyampau pampas nya jauh mimit ari gaji pemadu mit ke sepintu ruang bilik).
Kami deka betanya, baka ni berebak enggau maya Sarawak Energy ti udah ngaga sebuah tekat, nadai siku pan bala orang udah nyediaka perengka ti diguna ti disemaya ke orang bansa asal sebedau sida diansak tama ngagai palan pengentap pendiau ti salah ba undang-undang nya?
Enti Taib ulih ngasuh seraban polis ngemba bala orang bansa asal ti ngayanka bantah nya, nama kebuah iya enda ulih mayar pampas ngena gaji pemadu mit dikena sida napi pengidup baru sida?
Tu laban Taib udah milih awakka orang bansa asal nya enda ibuh lalu majak idup merinsa lalu iya endang nadai bejuluk ati deka ngamatka semaya iya ba raban bansa Penan enti bebanding enggau semaya iya ba raban bansa bukai di serata Sarawak, ti udah diburu iya ngena pengawa ngaga tekat enggau skim nugungka pengeraja ke iya empu.
Pia mega jaku-jaku semaya ti udah digaga iya enggau komuniti entarabansa ngambika nitihka penetap-penetap kuasa pengelantang sereta atur pengawa ngaga tekat udah enda dikamatka iya.
Bala pengarang berita ari raban NGO udah bisi mai pulai repot ti ngenyinuka ati pasal pekara ti udah nyadi di Murum ti ngujungka siku ari tuai sida, Ngang Buling, udah ditanka polis ba minggu nyin kemari.
Kami deka betanya nama jaku ti deka disebut kompeni-kompeni ari menua tasik ti udah kelalu andal ngulihka duit untung ari menua Sarawk ti bisi ngaga kaul enggau Taib ba perambu ngaga tekat iya?
Baka ni gaya kompeni Hydro-Tasmania, taja pan sida udah matak diri ari projek tekat ai ti tebilang nya, udah ninggalka pemesai sida, Nick Wright ti dijali sida ngagai SEB, nyadika orang ti ngemataka ‘Perambu Pengentap Pendiau Raban Bansa Asal’ di endur nya?
Kompeni Hydro-Tasmania enggau bos Sarawak Energy bebansa Norway, Torstein Sjotveit, udah kelalu kiruh madahka ngagai dunya ti ngumbai bekereja ke Taib, sida ulih mantu iya ngulihka ‘stindit ti udah ditetapka’ lalu nya ngasuh sida temegah.
Enggau nya, bisi-enda kini raban bansa di Murum nyadika gambar stindit ti ditetapka nya baka ti digiga Nick Wright, tauka bisi-enda kini kompeni-kompeni entarabansa nya udah belabuh meretika tuai bekukut-besi baka Abdul Taib Mahmud nya deka ngiga bala manang iya sebedau iya berunding enggau bala orang PR iya ti deka nulung iya ba projek, lalu udah ngambi duit sida lalu mai duit nya pansut ari menua Sarawak?
Taib bisi udah didinga ngansak ngambika nempa propaganda ngena mayuh bengkah media ti dikuasa iya dikena iya nimbal serang publisiti jai bekaul enggau Murum.
Iya ulih ngereja pemanah dikena ngubah pemingkuk ba atas bala orang ti seranta di menua Sarawak. Laban utai ti patut diperetika iya nya, iya majak tuai lalu chara iya bekereja pan majak tinggal-setinggal di belakang arus pemansang. Iya enda ulih lari ari perati dunya lalu dunya diatu ulih meda baka ni beduan raban bansa asal berebak enggau pengawa iya ti majak nugungka pengeraja ke iya empu.