Sarawak Report bisi nerima mayuh berita madahka pasal pengerembai penanggul ti majak balat nyadi ba empang jalai nuju tapak tekat Murum, ti diatu benung dikemataka dalam pengelama beberapa minggu tu ulih raban bansa Penan ti dipejal pindah ninggalka menua asal sida laban paras ai majak niki.
Bisi kira-kira seratus iku lelaki, indu enggau nembiak mit bansa Penan udah ninggalka tapak empang jalai sida ti terubah laban udah bekau ti dicharikka raban polis, lalu diatu sida mindah ngagai tapak empang jalai ti baru.
Empang jalai ti baru tu udah nanggul jalai tama enggau pansut ari tapak tekat Murum, nyengkaum jalai anak ti endang seruran ditengah kompeni Sarawak Energy Berhad (SEB) dikena matahka bantah dulu suba, dikena sida ngulihka jalai tama nuju pala tekat enggau tapak projek ti bukai.
Dalam kandang sehari dia empang jalai ti baru udah mujur didirika dikena nagang semua pejalai perengka pengangkut tama ngagai tapak tekat, nyengkaum lori pengangkut simen enggau kerita enggi kompeni SEB.
SEB madahka nadai empang jalai didirika raban bansa asal Kenyah enggau Penan di Murum!
Penanggul tu majak nyadi udah bekau bala tuai dalam SEB ti ngulu sebengkah aum ba Gerempung Bansa di menua Geneva, ti madahka menua Sarawak endang “bejalaika atur pengawa pemadu manah” ba tanggungpengawa sosial korporat enggau rampa menua sida.
Kami mega diterangka SEB udah ngatur sereta melanja sebengkah penemuai ke bala kaban Gerempung Pengarang Berita Sarawak ngagai tapak Tekat Murum.
“Sida datai ngena penerebai bilun ke Bintulu kena 28/29 haribulan Oktober, nerima jaku penerang ari SEB di Bintulu kena 29 haribulan nya. Sida dianjung nemuai ngagai palan Pengentap Pendiau Tegulang, lalu ba hari ti kedua sida dibai nemuai ngagai Tekat Murum lalu pulai ke Bintulu baru lemai nya ti endur sida dijamu makai malam nya (lalu sida mega disemayaka SEB ti deka milih lalu meri perais ke artikel berita pemadu manah ditulis sida) lalu pulai ngagai menua diri empu kena 1hb November.”
“Nadai empang jalai”
Sarawak Report mega diterangka ba semanjai penemuai bala pengarang berita nya SEB endang enggau naka ulih nagang sida becheritaka pasal sebarang empang jalai ti bisi didirika raban bansa Penan tauka Kenyah di Murum.
Penerang ti baka tu endang sebengkah penerang ti bula ngerang-ngerang.
Ke bendar iya bala pengarang berita nya dibai enggau naka penyimat mansa empang jalai, ti lebuh maya nya benung dikepit dua baris raban polis ti benung bejaga di endur nya.
Bala pengarang berita nya diangkut ngena konvoi kerita soldadu ti mayuh ti ngagang sida nuliska repot lebih ari ti udah dituliska SEB ti diberika ngagai bala pengarang berita ba pengujung penemuai sida nya.
Bisi mega ditusui nya bala pengarang berita dibekalka enggau mayuh macham penerang ti ditempa-tempa SEB pasal raban bansa Penan enggau Kenyah, ti diburu pansut ninggalka menua asal sida empu ari ulu tekat Murum nya.
Artikel-artikel berita ti ditusui bala pengarang berita nya endang nadai nyebut pasal empang jalai ti didirika raban bansa asal di endur nya.
Pekara-pekara pasal pengelantang enggau pengelikun
Pengerembai berita di Murum berengkah enggau pengirau ati gerempung-gerempung NGO bekaul enggau pekara pengelantang enggau pengelikun raban bansa asal dia, ti benung betan ba empang jalai dalam pengelama beberapa minggu tu udah.
Sebengkah delegesyen NGO ti udah mujur mai tama bekal pemakai ngagai ruang bilik bala orang ti benung
ngemataka empang jalai ba minggu nyin kemari, madahka bekal ai beresi enggau endur ngenduh nya mit bendar lalu balat nanggul sida maya napi hari ujan enggau panas bisa, ti lalu ngujungka penyakit pedis perut enggau tabin udah belabuh nuntung bala orang ti betan ba empang jalai nya, nyengkaum bala nembiak ti mit-mit.
Tang seninjik bendar semak endur empang jalai ti diibun sida nya bisi sebatang anak sungai ti beresi. Tang raban NGO nya mega irau laban pemeresi ai sungai nya mega tau nyadi kamah kena telusur jalai di endur nya.
Bala orang bansa asal ti benung ngibun empang jalai nya udah minta bekalka ubat enggau bekal pemakai ke guna sida dalam pengelama beberapa hari agi.
Sarawak Report bisi udah meri bantu (ngena sukung ke dulu ari tu) dikena nyukung pengawa bala orang ti mai tama bekal ubat enggau pemakai ngagai tapak empang jalai nya.
Gerempung-gerempung NGO ti benung ngemataka tapak empang jalai nya diatu mengkang nganti reaksyen ari orang ti bekuasa napi gaya pekara ti nyadi enggau beubah-ubah nya.
Raban NGO International Rivers madahka pengirau ati sida nya majak nambah beduduk ba pekara ti benung nyadi di Murum lalu ba pekara pengelantang enggau penglikun raban bansa Penan enggau Kenyah ti tanggul nya. Sida benung ngemanahka penerang ari raban NGO ti bukai ti deka dichelak lalu disadung ngambika ditemu mensia mayuh enda lama agi.
“Kami nuliska berita tu dikena kami nerangka pemalat pengirau ati kami ke bala orang indu, lelaki enggau nembiak mit bansa Penan ti benung mantah enggau chara ti manah ba tapak Projek Kuasa Hidro Murum ti benung dikelingi raban polis ti besenyata kenyau ari 5hb November 2013. Bala lawyer, raban NGO pengelantang enggau pengelikun mensia, bala pengintu pengerai, bala pengarang berita enggau konvoi kerita ti ngundan bekal pemakai enggau ai irup ngambika diagih-agihka udah ditagang tama ngagai tapak tu.” [Tania Lee, International Rivers]