Dalam kandang seminggu tu berita bisi madahka Sarawak Energy udah ditemu ninggalka tapak ngaga Tekat Baram.
Tang empang jalai ti dikemata bala orang bansa asal, agi benung betan dikena nagang kompeni enggi perintah menua pulai baru ngagai tapak ngaga tekat Baram nya.
Pemansang berita nya udah ngelai pemenang ke orang bansa asal, ti balat bendar mantah tekat besai nya digaga di menua sida, ti tau muru beribu-ribu ruang bilik ari tanah pesaka lalu nengelamka menua ti besai bendar rampa.
Kami mega bisi dipadahka Pengari Rakyat Denis Ngau udah ngansak kompeni Sarawak Energy nyurutka diri ari projek ti balat bendar dibantah bala pemgundi ba pelilih menua nya.
Kelimpah ari nya, Ngau udah ngasuh orang ringat ati laban iya madahka bala orang asal mantah projek nya ketegal sida udah diasut raban NGO kuasa pengelantang mensia.
Siku Tuai Kampung udah ngirumka sepuchuk surat ngagai Denis Ngau nyadika saut iya ngagai tuduh penemu Ngau, ti ngayanka pengeringat raban bansa orang asal ngagai YB sida nya.
Raban sida ti dibatak pulai nya raban anak kuli SEB kena hari Empat 25hb Sepuluh tu tadi, lebuh maya seraban kira-kira 30 iku bala pakar geologi ti datai ba tapak tekat di Na’h di ulu Baram laban bejalaika pansik ba batu dalam tanah di endur nya.
Bala orang bansa asal di menua nya benung napi seraban bala pakar geologi nya lalu ngasuh sida jampat-jampat pansut ati endur nya.
Raban pakar geologi nya udah nirika langkau arau sida, udah minta diri berunding lalu udah nya sida deka pulai ari endur nya, tang bala orang bansa asal madahka sida enggai agi berunding laban sida nadai udah nerima saut ti ngemuaska ati ari kompeni SEB lalu diatu sida ngenggaika sebarang tekat.
Raban nya lalu beguai-guai ninggalka tapak tekat endur sida nirika langkau arau sida enggau semua perengka ti dikena sida bekereja, lalu bala orang bansa asal udah muka kain langkau arau sida dikena nutup semua perengka ti tinggal dia laban enggai ke ditinggang ujan tauka dikebuka ribut.
Udah bekau nya raban bala pakar geologi ti nyurutka diri nya dientunda-udi ke kira-kira 30 iku pemesai ari Opis Tanah enggau Survei, ti disempulang 14 iku raban polis ti besenyata, ti udah mindah ngagai jalai nuju tengan menua Baram, enda jauh ari Long Lama.
Raban nya betemu enggau bala orang ti ngibun empang jalai ti bingking betubuh kira-kira 100 iku orang bansa asal siang enggau malam. Ba ujung minggu tu sida ditemu matak pulai 4 buah buah kerita lipan bansa ekskavator enggau tiga buah kerita lipan bansa subul, ti udah dibai tama dulu ari nya.
Diatu ke semua raban pengelikun enggau polis udah ninggalka menua nya. Semina ke tinggal nya sekeda perengka ti dipelabaka udah rusak injin.
Raban anak kuli di Long Lama udah ngarika seraban anak kuli ti bukai ti dulu agi datai di endur nya. Rumah udah didirika endur bala anak kuli diau, ti disadang deka belabuh bekereja ngaga jalai tama ngagai tapak tekat nya di sebarang maya.
Pengawa-pengawa tu (ti nyadika sebengkah kontrak ti diberika ngagai sebengkah kompeni enggi sida Kepala Menteri sebilik, PPES) udah mega digantung dulu.
Sebengkah agi pemujur ke bala orang bansa asal nya ti endur seraban tukang tumbang udah ditanka ba minggu nyin kemari, ti ba pun iya sida madahka diri ukai setanah enggau Sarawak Energy. Sida madahka sida semina ngulihka kayu batang ngena siti lisin kayu.
Tang lebuh bala tukang tumbang nya dichabar awakka nunjukka kar menua enggau lisin sida, dia sida lalu mandangka kar menua ti bisi ngundan chap kompeni SEB enggau semua macham arung jalai ti deka digaga sida nuju tapak tekat Baram nya.
Enggau nya, bala tukang tumbang nya ke bendar iya udah diberi kontrak ari SEB ngambika nebang semua kayu batang di semanjai arung jalai nuju tapak tekat Baram nya ti tau dijual.
Enggau chara seninjik tauka endang disengajaka, tindak ti dipeda nyadi sama sereta nya endur pengari Menua Sarawak enggau SEB udah meri penerang ba Gerempung Bansa di Geneva, sida endang bebasaka semua atur entarabansa ba ngaga tekat besai lalu diatu kenu ku sida, pengawa sida endang bedau belabuh.
Beserimbai enggau pengawa sida nganjung kerita lipan sida dikena ngaga rumah ke anak kuli lalu nebang kayu dikena muka jalai, bala pengari ti enggau baum di Geneva udah bediri lalu bejaku durah-durah madahka “bedau bisi sebarang pemutus runding” sekali ke sida deka majakka projek nya tauka sebarang 12 buah tekat ke bukai.
Kompeni SEB udah ngeluarka penerang ba suratberita dikena nyukung jaku dawa sida ti madahka selampur projek nya agi ba renggat bejuraika penemu. Lalu CEO ke SEB bebansa Norway, Torstein Dale Sjotveit, ti baru udah diberi Perintah menua Sarawak gela Datuk nya, udah kering bendar jaku madahka Tekat Baram enda deka digaga seagi-agi pemendar bedau dikeluarka nyentuk ke taun 2014 ila!
CEO Torstein dalam SEB udah meri puku duit manggai beratus-ratus juta ringgit ngagai kompeni enggi bos iya, Taib Mahmud (nyengkaum kontrak ti besai ngagai PPES dikena sida ngaga Tekat Baram) mega direkodka ti dilamun SEB ti ke bendar iya udah nginjau RM15 billion dikena ba projek nya.
Penerang bekaul enggau duit injau SEB nya bisi dalam Rekod Pengerejista Kompeni, ti tau diperesa mensia mayuh, taja pan SEB lalu bedau ngeluarka Rekod Pekara Wang sida kenyau ari taun 2010 suba. Ukai tu ti dikumbai sida ‘pengawa pemadu manah’ ti dipadahka CEO bebansa Norway nya?
Bala pemerati ti landik madahka chara dikena Sjotveit ngarika Taib bejalaika pengawa nya, madahka jaku tuduh di Geneva nya kemari endang diatur besenutuk enggau pemun pengawa di Baram, lalu chara nya endang tipikal.
Pengawa nya endang ukai pengawa ti besenutuk ti endur SEB madahka ba aum Gerempung Bansa di Geneva, sida udah belajarka chara ngaga tekat ari menua Laos, sebuah tekat ti udu napi jaku bantah mensia mayuh sereta disadang mai pengerusak ke rampa menua nya benung digaga.
Bala orang bansa asal Sarawak engka enda ulih dikeduan bos SEB nya agi taja pan iya madahka diri udah nemuai ke menua Laos bekaul enggau atur bebasaka Kuasa-Kuasa Pengelantang Mensia.
Sida mega udah madahka sida diatu enda ulih dikeduan tauka dikemulaka agi. Tang ba kes ti baka tu, kompeni SEB enggau Taib Mahmud suah bendar ditemu nipu orang bansa asal, lalu ukai raban NGO baka ti ditusui nengah suratberita enggau media ti bukai.
