Kepala Menteri Sarawak ti deka ngetu ari pengawa iya, Abdul Taib Mahmud, udah bebendar amat ditemu nguji ngelamun jaku tuduh orang mayuh bekaul enggau sida sebilik dalam skandal makai suap ekspot kayu batang di menua Jepun, ti udah tebantai dalam taun 2007 suba.

Tang pengamat bekaul enggau kes tu benung diayanka dalam kereta kes dawa dalam tribunal pekara chukai Jepun, ti tau diperesa semua orang.
Sarawak Report diatu udah bejalaika pansik bekaul enggau kes nya lalu ngatur pengawa nyalin surat penerang jaku Jepun nya ngagai jaku English.

Penerang ke diatu nya udah mantaika enggau silik baka ni menyadi Taib empu, Onn Mahmud, udah ngulihka mayuh bendar duit ari pengawa ekspot nya dalam beberapa taun ke udah.

Duit nya ti patut dipasukka dalam pekara chukai kastam lalu pekara nya udah nyungkak jaku tanya ti baru ngagai Taib, ti seruran madahka diri nadai bekaul dalam skandal nya.

Tambah mega, Taib udah ngapuska chukai kastam ba ekspot kayu batang dalam taun 1988, tang ke bendar iya udah ngubah chukai nya nyadika chukai Taib sebilik, ti digelumuka kompeni-kompeni sida di menua Hong Kong baka Regent Star, ti nyadika titik pemun bantai skandal makai suap nya.

Kami udah ngamatka kaul entara kompeni ti bejalaika pengawa bepayungka Regent Star enggau bini sereta bala anak Taib empu, lalu mega enggau menyadi iya empu, Onn Mahmud.

Surat-surat penerang kami ti udah dianjung kami ke Tokyo minggu tu tadi ngagai pemesai perintah Jepun enggau sekeda suratberita sida, nya nyadika sebagi ti besai ari kimpin NGO dikena madahka ngagai perintah Jepun pasal penyalah makai suap Taib Mahmud lalu pengawa iya berusakka kampung Borneo ti pemadu tuai di dunya nya.

Lebuh skandal ekspot kayu batang jepun nya tebantai dalam taun 2007 suba Taib udah enggau jampat mansutka penerang iya empu dalam DUN, bebulaka kaul enggau kompeni Regent Star, ti udah nerima duit di Hong Kong ari gerempung pejalai kapal Jepun, ti beduduk ba surat sempekat ti dikumbai NFA (National Freight Agreement).

Dalam jaku iya kena 14hb Empat 2007 “nadai penerang” dikena nyukung tuduh dalam suratberita di menua Jepun, nyengkaum suratberita Tokyo Times, ti nyebut 1.1 billion yen udah dibayar ngagai Regent Star dikena “ngemudahka” pejalai pengawa ekspot kayu batang Sarawak ke menua Jepun.

Kepala menteri nya udah ngumbai jaku tuduh nya “kelalu bula” berindik ba berita angin ti nadai disukung enggau penerang ti tegap.

Tang salin reviu ofisyel Tribunal Apil Pekara Chukai Jepun bekaul enggau kes nya terang bendar nunjukka penerang dalam suratberita nya ukai berindik ba pemeri penerang ti belalai, tang ba penerang ti tegap ti diberi dalam pechara asal kes nya, udah bekau pansik ofisyel enggau pechara dipejalaika raban pekara chukai Jepun dalam taun 2007 suba.

Raban pemansik pekara chukai Jepun udah ngaga simpul penemu ti madahka Regent Star nadai nyediaka ‘servis orang tengah’, baka ti dituduh kompeni-kompeni kapal dikena nyeliahka chukai, tang ke bendar iya nerima ‘belanja pemerindang’ (duit suap) bejuta-juta ngarika Onn Mahmud.

Pechara nya udah nerangka reti belanja pemerindang, ba undang-undang Jepun enda ulih diseliahka ari sistem chukai Jepun.

Ngena jaku pandak, bala pemansik pekara chukai Jepun udah ngaga simpul penemu ti madahka mayuh agi ari bayar ti diberika ngagai Regent Star nya nyadika duit suap ngagai Onn Mahmud, ti udah dikelala nyadika orang ti ngatur pejalai kompeni Achipelago, ti udah diberi kuasa ngeluarka permit ekspot kayu batang ari Perintah Menua Sarawak, ti endur menyadi iya, nyadi Kepala Menteri Sarawak.

Tu mih ti nyadika pugu ukum pemadu berat lalu asi pansik iya, ukai berita angin ari pun penerang ti belalai, ti udah meri penerang ngagai pengarang berita nya.

Atur penchara ti panjai bendar dalam Tribunal nya diatu tau dibacha dalam jaku English. Ba bala pemacha ti endang nemu pasal ayuk kes tu, mudah bendar pejalai dawa tu dititihka, taja pan mayuh bagi ari salin nya udah dikusungka ketegal dikena nyaga identiti bendar sekeda orang siku-siku.

Tambah mega, nama kompeni baka Achipelago Shipping enggau DNS (Dewan Niaga Sarawak) bisi disebut dalam pechara ti dikeluarka nya, ti dikena ngamatka pasal kes ‘pemerindang’ Regent Star nya.

Surat-surat penerang pechara Jepun nya nunjuk ngagai semepekat asal ti digaga dalam taun 1981 suba, ti endur Taib Mahmud udah mansutka jaku, lebuh opis SEDC nanggam sempekat enggau gerempung pejalai kapal dagang NFA Jepun laban ti meri sida dagang nengali ekspot kayu batang ari Sarawak.

Sempekat nya udah ditanggam enggau Dewan Niaga Sarawak (DNS), sebuah kompeni 100% diempu SEDC. Taja pan udah nya Taib Mahmud, ti nyadi Kepala Menteri/Menteri Pekara Wang/Menteri Perambu maya nya, madahka diri enda ngelala pasal dagang nengali (monopoli) resia nya lalu nya mega ukai tanggungpengawa iya.

Tambah mega, mayuh ari bala orang ti udah bisi tanggungpengawa sama enggau ngaga pemutus runding lebuh ti ngemendarka sereta meri dagang nengali nya diatu udah parai, nitihka penerang ari Kepala Menteri nya.

Kepala Menteri nya seruran meri ketegal sereta bebula dalam jaku iya ti kala ngemendarka salah guna dagang nengali ekspot kayu batang pemadu besai di menua Sarawak.

Taja pan SEDC nya nyadika sebuah ari opis perintah, Taib udah madahka pekara nya ukai tanggungpengawa perintah. Agi mega mayuh ari bala orang ti bisi bekaul enggau pengawa nanggam sempekat nya suba diatu udah parai.

Taib Mahmud mega udah bebulaka penerang dalam jaku iya ti madahka iya enda ngelala lalu enda kala ninga nama kompeni Regent Star.

Tang, pansik Sarawak Report ba Regent Star bedau lama tu udah ulih ngayanka kaul ti rapit entara Regent Star enggau sida Taib Mahmud sebilik – ukai semina nengah menyadi iya empu, Onn Mahmud, tang mega nengah (niang) bini iya, Laila Taib, enggau dua iku anak lelaki iya, ti kala ngirumka duit bejuta-juta dollar ngagai anak indu iya, Jamilah, di menua Kanada dikena beranakka puku dagang dalam kompeni reta, Sakto, dalam taun 1996 suba.

Duit nya udah dipindahka nengah sebuah kompeni sapit, Richfold Investment, ti udah dikorporatka kena hari ti sama enggau bepala ba opis ti sebaka enggau Regent Star di Hong, ti dikemataka Pengarah iya, Shea Kin Kwok, ti nyadika siku pengereja pengawa ke Onn Mahmud.

Sebuah agi kompeni ti sama bekunsika alamat opis enggau Richfold enggau Regent Star dalam Bilik Opis 1001, Yardley Common Building, Connaught Road, Hong Kong nya dikelala enggau nama Natalite Investment.

Dalam taun 2006 suba bala anak Taib Mahmud enggau menyadi iya Onn Mahmud udah ngerejistaka alamat sida enggau Natalite Investment lebuh sida ngisi retan ofisyel enggau perintah Amerika Syarikat nengah kompeni reta sida ti bukai, Sakti, ti bepalan di California.

Pekara ti nyelai, setaun udah nya, iya nya dalam taun 2007 Taib madahka diri enda kala ninga nama kompeni Regent Star, taja pan sida sebilik ke bukai terang bendar bejalaika pengawa dagang sida nengah kedua buah kompeni ti dikemataka menyadi iya empu ba bilik opis ti sama!

Dalam jaku iya ba Dewan Undangan Negeri Taib Mahmud mega mansutka penerang bekaul enggau ubah-ubah dalam atur sempekat ekspot resia nya, ti endur iya madahka diri enda nemu ulu-ili lalu nadai kaul enggau iya!
Dalam taun 1987 suba, atur pengempu kompeni nya, Dewan Niaga Sarawak, udah diubah enggau berupai bendar – iya sebengkah pekara ti diaku iya begunaka pemendar ari perintah menua Sarawak. Dewan Niaga Sarawak udah diubah nyadi kompeni swasta ari reta menua ti terengkah ba jari kompeni ti ngatika diri.

Kepala Menteri udah nguji ngelalaika pugu penerang bekaul enggau jaku iya ti madahka Achipelago Shipping, ti nyadika pemegai mayuh agi syer dalam Dewan Niaga Sarawak, diempu lalu dikemataka menyadi iya empu, Onn Mahmud, ti nyadika pengurus dalam semua pengawa dagang Taib Mahmud sebilik.

Enti jaku-jaku tanya dikemendarka dipansutka bekaul enggau penerang ari Kepala Menteri nya, dipelabaka bisi sekeda ari kaban DUN deka betanyaka pasal danjang tanggungpengawa ti bisi kaul enggau atur ngemataka aset orang mayuh ngagai menyadi Kepala Menteri nya.

Tambah mega, maya nya, Onn Mahmud nyadika Pengerusi enggau pemegai syer pemadu mayuh dalam kompeni Cahya Mata Sarawak Berhad (CMSB) ti bisi kaul terus enggau pengawa numbuhka kompeni-kompeni reta Taib di menua tasik lebih agi di Kanada enggau USA!

Udah nya, pekara kedua ti berupai bendar nya Taib mega ngenang pasal jaku iya dalam taun 1988, lebuh perintah menua Sarawak udah ngapuska chukai-chukai kastam ba pengawa ekspot kayu batang.

Taib milih mantaika pasal pemutus penemu perintah nya awakka dikena iya ngelipakka perintah bempu tanggungpengawa ba ‘sempekat komersil’ entara Dewan Niaga Sarawak enggau NFA.

Tang, nama ketegal ti diberi iya tauka timbang penemu iya ari ngapuska chukai ti berega nya ari menua lalu ngujungka menua ngemataka pengawa dagang ekspot kayu batang enggau chara ti baka nya?

Penerang ti diatu ti ditemu kami ari Tribunal Pekara Chukai Jepun ngayanka siti ulu lungga entelah. Laban bala pemansik chukai udah meri penerang ba sebengkah sempekat resia ti bukai ba maya tu ti nerangka pasal sempekat bedagang nengali entara Dewan Niaga Sarawak enggau NFA.

Ari surat-surat penerang nya kami tetemuka tiga iti kontrak ti bisi bekaul enggau pangan diri ti ditumbuhka entara NFA, Achipelago Shipping enggau sebuah kompeni ‘orang tengah’ ti ditumbuhka ngambik bejalaika semua atur pengawa nya.

Kompeni orang tengah nya Regent Star ti udah dikelala raban pemansik Jepun ti dipejalaika Onn Mahmud, dikena ngulihka duit ti mayuh ari NFA, lalu nukar kerejasama nya nengah Achipelago Shipping/Dewan Niaga Sarawak ngemendarka ekspot kayu batang.

Munyi ti dipansutka bala pemansik chukai Jepun nya, sida mutuska penemu sida ti madahka pengawa orang tengah nya dipejalka ba bala pengekspot kayu batang, ti ba pun iya enggai bejalaika pengawa dalam skim pengangkut nya.
Namun, sida pechaya Onn Mahmud udah mujur ngangkatka kuasa iya ngemataka ekspot nya laban iya bempu tanggungpengawa ti besai agi atas Dewan Niaga.

Enggau chara tu, tau disimpulka pasal duit nya ba sebengkah maya dibayar bala pengekspot nya ngagai rayat Sarawak nengah chukai kastam, diatu dialihka ngagai sida Taib Mahmud sebilik nengah ‘bayar orang tengah’.
Duit nya dianggap Onn Mahmud nyadi penatai pemisi iya, ku raban pemansik chukai Jepun nya.

Baka ti diperatika sida, terang bendar NFA enda nemu sebarang bida entara mayar Regent Star enggau Onn Mahmud empu.

Tambah mega ba sebengkah maya sida tetemuka bayar ngagai Regent Star enggau Onn Mahmud empu diatur dalam sebengkah pemindah duit. Tu nunjuk dua iti penunga bayar nya endang sebaka baka ti dipeda bala pengekspot Jepun dalam skim nya.

Sarawak report diatu ulih ngamatka penerang ti madahka Pengarah dalam kompeni Regent Star, Shea Kin Kwok, nya pengereja pengawa ke Onn Mahmud, nyadika pengurus opis ti nyaut semua macham kangau telefon ba bilik opis 1001, Yardley Common Building, 1-6 Connaught Road ba Hong Kong.

Bala pemansik mega netapka Onn Mahmud, ba sebengkah maya, udah ngena kuasa iya nikika ‘bayar orang tengah’ nya tiap kali sempekat nya digaga baru.

Dalam beberapa taun udah nya lebuh ekspot kayu batang nyau majak bekurang, Onn Mahmud udah minta bayar ditikika. Tu udah meri tekan ngagai bala pengekspot kayu batang Jepun ti bulih penguntung ti majak bekurang.
Gaya pekara tu udah meri tekan ti berat agi ngagai kompeni-kompeni Jepun nya laban sida ngembuan kuasa betawar ti mimit lalu Onn Mahmud kala ngagang ekspot sida dikena iya nekan sida, nitihka penerang ari Tribunal Chukai Jepun.

Udah bekau nya, Taib udah ngemendarka menyadi iya bejalaika kemata iya ba ekspot kayu batang, lalu dikena menyadi iya nimbal pemanah Taib nya, Onn ngena chara bekasar ngulihka sepemayuh duit ari kompeni kapal Jepun nya.

Ba pun iya, gerempung kompeni kapal Jepun NFA udah dichukai enggau tinggi ti dipejalaika opis chukai Jepun laban sida nurutka peminta servis orang tengah Onn Mahmud lalu nguji minta diri enda kena chukai agi ba menua sida empu,

Asil pansik ba pun nya udah ngaga simpul penemu ti madahka Regent Star nya nyadika kompeni kerubung ti ditumbuhka sebulan sebedau abis timpuh sempekat enggau Achipelago/Dewan Niaga enggau NFA dikena nerima bayar ‘pemerindang’ ngarika Onn Mahmud.

Kompeni-kompeni dalam gerempung pejalai kapal nya udah ngenataika apil sida lalu dalam 2008 udah bekau kes sida diperesa baru, Tribunal Apil udah matak pulai ukum ba atas sida.

Tribunal Apil nya nurutka peminta sida ari kena ukum laban ketegal raban pemansik nadai bulih penerang ti silik pasal ‘bayar orang tengah’ Regent Star nya terengkah ba jari Onn Mahmud lalu Regent Star nya nyadika kompeni kerubung, lalu ukai nyadika orang tengah ke bendar bekereja enggau Achipelago/Dewan Niaga.

Tribunal Apil nya lalu ngaga pemutus penemu sida ti madahka ‘bayar orang tengah’ ti manggai bejuta-juta ringgit ngagai Regent Star nya engka tau enda dichukai baka ti dikereja atas kompeni-kompeni kapal Jepun.

Enggau nya kompeni-kompeni Jepun nya udah enda diukum lalu berebak enggau nya Regent Star udah badu agi bejalaika pengawa tekala nya beserimbai enggau maya Taib ti madahka diri enda kala ninga nama Regent Star tauka bisi kaul dalam dagang ekspot nengali kayu batang ti dipejalaika menyadi iya.

Sarawak Report udah mantaika sekeda penerang ti enda ulih dibantaika Tribunal Apil Chukai Jepun nya.

Kami ulih ngamatka Pengarah enggau Pemegai syer dalam Regent Star, Shea Kin Kwok nya ukai orang tengah ti ngatika diri, tang semuti siku pengereja pengawa dalam opis Onn Mahmud.

Batang pengawa iya semina nyaut kangau telefon dalam opis Onn Mahmud lalu iya semina nyadika nomini (pengari) megai mayuh bengkah syer dalam kompeni.

Pengarah enggau Pemegai syer ke bukai ti sama bisi dinamaka dalam kompeni-kompeni nya Kho Eng Beng, ti mega nyadika pengereja pengawa ke Onn Mahmud.

Sarawak Report mega ulih nentuka bini enggau bala anak Taib ulih dikaitka enggau raban kompeni tu, masuk enggau kompeni sapit ke Regent Star, Richfold Investments ba pengawa sida ti mindahka duit jali ngagai kompeni enggi Jamilah di Kanada dalam taun 1996.
Baka nya, sebengkah agi kompeni sapit dalam Regent Star, iya nya Natalite, udah ditemu ngena alamat bala anak Taib lebuh sida ngerejista pengempu kompeni Sakti, iya nya sebengkah agi kompeni reta di menua US.

Penerang-penerang ti udah dikamatka tu, taja pan Taib suah nguji bebula ke diri enda ngelala Regent Star, tang kompeni nya ukai semina diempu lalu dikemataka menyadi iya empu Onn Mahmud, tang nya mega udah nyadi sebagi ari kompeni-kompeni sida di menua Hong Kong.

Taib Mahmud udah nyaman lalu minta jaku minta ampu ari sekeda suratberita enggau orang siku-siku di menua Malaysia ti nuliska repot ti bisi pansut dalam suratberita di menua Jepun bekaul enggau pengawa makai suap iya nengah Regent Star.

Tang, 5 taun udah nya terang bendar Taib ba kali ke terubah ngemendarka pengawa ngeluarka lisin ekspot diswastaka lalu udah nya ngemendarka bayar ti besai dipasukka ngagai sebengkah kompeni bukai ti dipejalaika sereta dikemataka sida sebilik

Kami ngansak raban penerit undang-undang di menua Jepun diterangka pasal repot polis ti deka kami kirumka enda lama agi ngambi kes Regent Star nya dibuka baru, nyadika sebengkah kes ti bisi kaul penyalah makai suap enggau siku orang pengereja pengawa awam ti ofisyel di Sarawak.

Kami mega ngansak raban pemansik chukai Jepun meresa baru ikas ekspot kayu batang Sarawak ke diatu lalu meda nama bansa atur pengawa ti dipejalaika dikena ‘ngeregaska enggau mantu’ pengawa ngeluarka pemendar ari sebengkah kompeni ngatika diri ti bekuasa atas sida.

Kompeni ti dikenang nya, CMS Shipping ti udah ngambi alih tanggungpengawa ari Achipelago Shipping sereta Taib Mahmud mutuska kaul dagang iya enggau menyadi iya empu, Onn Mahmud, dalam taun 2004 suba.