Agi bisi dua minggu peluang endur Menteri Besai Malaysia ngatur sebengkah tindak ba siku liability entarabansa ti tau meri malu ngagai menua enggau bansa, iya nya Kepala Menteri Sarawak, Abdul Taib Mahmud.

Kleptokrat tuai ti benung balat dibalut skandal makai suap enggau salah guna kuasa nya udah nyerahka surat badu bekereja iya, ti deka dipejalaika kena 28 haribulan Dua tu ila, tang iya mega bejuluk ati deka majak bekuasa ba atas menua iya nya.

Ngena kuasa chara tuai bekukut besi iya, Taib udah maduka penganti iya empu, iya nya kaban belayan iya empu ti tuai sereta enda tentu bepengerai nya, enggau enda dibantah bala ukui pengasu iya dalam parti iya, PBB.

Enggau jampat mega iya udah nentuka iya bisi bendar pengarap ba Agong, ari pinta Menteri Besai Malaysia, awakka nyiri iya ngadi Gabenor Sarawak ba sebengkah pengerami dalam beberapa hari agi.

Taja baka nya, ke terubah iya, iya napi sebengkah maya ti tau bendar nganu iya empu, nengah jaku penerang ti deka dipansutka.

Najib Razak enda patut ngelepaska peluang ti pemadu berega tu.

Iya patut enggau naka penyampat nagang Taib, sekumbang Taib ti nganti pemutus ti enda temu pun enggau ujung nya. Lalu enggau ulah Menteri Besai ti enda engkeretik nya nunjukka iya benung berundingka pekara nya enggau dalam.

Politik nya ngereja pengawa enggau chara ti chakah sereta kasar ke pemanah bala rayat mayuh ba maya ti begunaka nya.

Ke terubah iya Taib udah ngelenyauka diri sekumbang berita angin pasal utai ti deka dipansutka iya sebedau utai nya nyadi nyata.

Enda lama udah nya iya pansut baru lalu meri penerang pasal iya ti deka badu bekereja, tang iya mega deka nentuka sapa ti patut nganti penuduk iya, lalu beserimbai enggau nya iya meri tanda ke juluk ati iya ti deka nyadi Gabenor Sarawak lalu mengkang bekereja baka selama.

Bala ukui pengasu dalam PBB lalu belabuh betempap jari di serata menua Sarawak, tang ulah KL ti enda engkeretik nya udah nandaka sida enda gaga tauka ransing ati baka ti dikarapka. Sekali ke perintah Najib meda pekara nya ari sukut positif tauka enda?

Kena hari Satu, Menteri Dalam Menua enggau Kepala Polis Menua direpotka udah nemuai ngagai opis Taib di Kuching. Kebuah ti nemuai nya dikena berandauka pengawa nyediaka bepilihbesai ti disadang deka diatur sebedau timpuh DUN nya chukup. Nyelai bendar!

Sekali ke pansik raban SPRM mega nyadika sebagi ari batang randau maya penemuai sida nya?

Sereta udah bekau penemuai sida nya Taib lalu ngambi tindak ke diri empu lalu ngelanggurka kaban belayan iya empu ti udah tuai sereta enda tentu bepengerai nya nyadi Kepala Menteri nganti iya, semina beberapa jam sebedau Sapit Menteri Besai Muhyiddin Yassin datai ari KL, ti dipelabaka datai enggau tuduh penemu ti lain agi. Sekali ke Taib deka ngambi tindak sebedau Najib ngeluarka sebarang penerang?

Semina dalam timpuh beberapa jam, sebedau Najib ngambi tindak iya meri jaku puji ngagai atur nyiri Adenan Satem. Tambah mega Perintah ti betuaika iya endang bisi chalun sida empu, iya nya Abang Johari ti dikumbai sida chukup beresi. Ba Taib empu, juluk ati iya ti deka dichiri nyadi Gabenor ba ujung bulan tu, naka ke diatu lalu bedau bisi sebarang penerang dikeluarka.

Baka ni enti Najib ngatur singkang iya empu kelimpah ari ti ngamatka juluk ati Taib?

Tu mih maya endur mechat orang tuai Sarawak nya lalu tu mih maya ti jarang bendar bisi dikena masuk champur dikena nimbang kuasa.

Semina Najib aja ti ulih ngereja semua utai nya lalu ke dudi hari ila, iya deka dipeda baka pungka lelaki.

Bala kaban politik ti enda ulih engkeretik di menua Sarawak semina peli-peli mata nyadika pemerati sekumbang ti nganti atur dipejalaika betangkan-tangkan ba mua sida, enda salah-salah baka ti ngemataka atur nya nadai besangkutpaut enggau sida, lalu sida nadai betanggungpengawa nentu sereta milih tuai menua diri empu.

Menua Sarawak dipeda baka ti patut diperintah dua iku tuai ti udah tuai bendar umur ari orang diri sebilik ti sama, lalu nadai siku pengari bansa Iban tau mangku pengawa pemadu tinggi, mayuh udah dikerandauka.

Sebengkah randau udah dipelabaka diatur lalu ti endur Najib enggau Agong deka ngambi tindak seduai nyiri Taib mangku pengawa ti dikinginka iya.

Tang, enti Najib nurutka peneka iya, Taib deka bekuasa belama, merintah menua iya ari opis Gabenor, beserimbai enggau atur iya mutarka pejalai politik anak lelaki iya (tauka anak indu iya, Hanifah) ngerebut kerusi Balingian ti udah dikusungka iya, dikena nyediaka diri nguluka PBB ba bepilihbesai ti deka diatur dua taun ari diatu.

Ipar iya ti udah tuai umur sereta enda tentu bepengerai nya deka dipechat iya, lalu pengawa iya pan tembu.

Tang, bisi sebengkah lupak dalam proses nya ti baru tebuka. Diatu Taib udah berubah ari siku tuai menua pemadu bekuasa di Malaysia nyadi siku orang ti ngelempaika pengarap iya ngagai Najib nyiri iya nyadi Gabenor.

Enggau enda mukai-mukai Taib udah bepanggai ba Najib, lalu nama kebuah Najib enda ngena peluang nya ngatur tindak ngena kuasa enggau penuduk menteri besai iya nya?

Tang baka ni enti jurai udah diatur? Nya meh ti dikumbai orang politik!
Batang pengawa Najib nya ditagaka ngagai rayat iya lalu ukai berat agi ngagai tuai bekukut besi ti pengamah, Taib Mahmud nya.

Mayuh chalun ti landik sereta pandai sereta enda kamah nama, ti tau dipilih Najib dichiri nyadi Gabenor Sarawak, kelimpah ari ti enda tau enda nyiri siku orang ti balat dibalut penyalah makai suap enggau salah guna kuasa, lalu paut iya ba kuasa nya nyau majak balat agi.

Pansik SPRM ti benung dipejalaika ba penyalah makai suap Taib dalam pengelama beberapa taun nya besai bendar reti, ti endur bala pemesai SPRM ti mansik kes iya mengkang enggai madamka kes sida nya.

Pengarah Atur Strategi PKR, Rafizi Ramli diatu mansutka jaku penerang ti minta penerang ofisyel ari opis SPRM bekaul enggau pansik sida ti benung dipejalaika lalu parti penyakal nya madahka Taib enda patut dichiri nyadi Gabenor Sarawak seagi-agi iya bedau beresi ari tuduh salah guna kuasa enggau penyalah makai suap ti agi malut iya.

Enti Najib majak deka minta Agong nyiri Taib nyadi Gabenor, Taib ti udah tesat runding nya tentu deka bekuasa baru lalu enda ulih kena tegu agi, enggau anak iya ti besedia diasuh iya mengkang merintah atas rayat iya ti seranta di menua Sarawak nya.

Lalu Menteri Besai Najib Razak deka dipeda lemi enti dibandingka enggau Taib ti ulih ngatur semua kerusi ba ikas perintah besai.

Lalu bisi siti agi isu, ti endur Taib dipeda seruran ngamahka nama sebarang orang ti ngaga kaul enggau iya.

Sarawak Report diatu ulih mantaika, nyentuk ke ngagai maya Agong ti bepenuduk pemadu tinggi di menua nya tau bendar diengkahka ba penuduk ti ngemaluka iya enti iya mengkang dipinta nyiri Taib nyadi Gabenor Sarawak ba ujung bulan tu.

Laban bisi sekeda jaku tanya ti terang bendar tentu deka dipansutka bekaul enggau kaul entara iya enggau kepala menteri ti kaya nya, lebih agi atur nguan flat sida sebilik ba Hyde Park Place di nengeri London.

Beberapa taun tu udah Sarawak Report udah mantaika pasal Rumah Hampshire ti selalu dilawa sida Taib sebilik, ti ngena rumah nya nyadika palan endur sida bemalam di nengeri London – tambah mega sida sebilik endang suah bemalam dia semanjai taun.

Sida Taib sebilik nguan ba Flat 5 ba tingkat baruh, ti diregista atas nama Agong.
Pekara tu nyungkak jaku tanya sekali atur nyua rumah nya endang dipesetujuka entara Agong enggau Taib Mahmud?

Sekali ke, ambi ke chunto, Taib tauka siku ari sida sebilik nyua rumah nya ari Agong? Enti ya, sekali ke sida mayar suwa bulan ba penyampau £26,000 (RM144,000) sebulan/ £6,000 seminggu, ti ngujungka penyampau suwa nya tinggi bendar munyi ti dipandangka dalam iklan ke sebuah flat berega mar nya?

Beberapa bulan ke udah bala pengarang berita kami kala tepeda Abu Bekir, iya nya anak lelaki Taib, pansut ari Flat 5 lebuh iya ti nganti ba mua rumah nya.

Sarawak Report mega kala ngambi gambar siku agi anak lelaki Taib, iya nya Sulaiman, dianjung kerita besai ti sangkai ba mua rumah besai nya.

Sekali ke sida Taib sebilik benung mayar suwa ke rumah enggi Agong nya tauka enda, atur nya tentu nyelai bendar laban Agong ngaga kaul enggau siku orang politik ti dibalut penyalah makai suap, lalu ngarap sereta andal ke diri dichiri nyadi Gabenor menua Sarawak.

Betul bendar enti Agong enggau mulia iya ti tinggi nya enda dipinta Menteri Besai nyiri siku tuai perintah ti benung dituntung mayuh macham jaku tanya laban iya patut ditejuka badu bekereja dulu sekumbang ti kena pansik nya.