Siti pansik ti udah dipejalaika seraban bala saintis ari menua US ari Universiti Berkeley ti pemadu tebilang di California udah ngaga simpul penemu sida ti madahka kelimpah ari ngaga tekat kuasa hidro ti besai-besai, perintah menua Sarawak patut berundingka chara ngaga tekat ti mit-mit dikena ngemansangka menua pesisir enggau di ulu sungai.
Asil pansik nya deka dibantaika pagila dalam aum besai beserimbai enggau ‘Minggu Kuasa Ti Ulih Digaga Baru ASEAN’ di Kuala Lumpur lalu pansik nya nangkan pansik ti sebaka ti dipejalaika Universiti Oxford ari menua Britain, ti mantah bala tuai perintah bediktator ti kelalu gian begagaka tekat kuasa hidro besai-besai nyadika pengawa masau duit menua.
Repot pansik nya ti bejuraika pasal penguntung datai ari projek ti besai-besai ti diberika ngagai Sarawak Energy enggau kepala kompeni nya ti digaji enggau naka pemesai, Torstein Dale Sjotveit.
Beserimbai enggau nya, Sjoteit benung napi jaku tuduh orang ti madahka iya ngereja penyalah makai suap ketegal ti meri kontrak besai-besai dalam projek SCORE ti beungkus beribu juta dollar ngagai kompeni enggi sida Taib Mahmud sebilik ti nyadika bos iya.
Bala pemansik ti mega nyadika penulis repot pansik nya Rebekah Shirley enggau Daniel Kammen nerangka enggau silik nama kebuah skim ti besai sereta beungkus mar nya dipelanja ngena duit menua ti diinjau, baka SCORE, ti semina meri penguntung ti mit ngagai bala orang asal. Ngena Sungai Baram di menua Sarawak nyadika kes dalam pansik sida nya, sida tetemuka baka ni projek tekat ti mit-mit ulih mai pemansang ti besai agi reti ngagai menua pesisir.
Nitihka pansik raban NGO Bruno Manser Fund ari menua Switzerland ti udah meresa repot nya, sida udah mujur ngayanka:
‘pengawa mutarka penanggul ba ngeluarka kuasa chara ti mit-mit disadang ulih mantu ngeluarka kuasa karan ti lebih ngagai bala orang di menua pesisir bebandingka enggau projek ti besai-besai. Chunto ari Tekat Bakun nunjukka tekat ti besai-besai semina dikena meri kuasa karan ke sebelah nengeri enggau kandang menua industri, lalu menua pesisir – taja pan besemak enggau Tekat Bakun nya empu – mengkang nadai diberi kuasa karan.” [Penerang media BMF – 23 haribulan Empat 2014]
Industri-industri ti besai ti suah agi enggi orang ari menua tasik ti ngena bala anak kuli ari menua luar mega. Raban saintis ari Universiti Berkeley udah meri tuduh penemu sida ke chara ti manah agi, dikena ngeluarka kuasa karan chara ti mit-mit ti ulih digaga baru disadang ulih ngena belanja ti mimit agi tang ulih meri penguntung ti mayuh ngagai bala orang di menua pesisir.Peresa besaintifik ti meri tangkan bekaul enggau pemeli perambu ngaga Tekat Baram enggau penguntung bukai dalam SCORE ditambahka enggau penanggul politik.
Bepuluh ribu iku orang bansa asal, ti ngadang sida deka dipindahka lalu mega sida ti irau ati ke pengerusak ba rampa menua enggau batang sungai di Sarawak, nadai nunjukka sebarang kelai dekqa nyurutka diri tauka ngemendarka raban pengereja pengawa Sarawak Energy tama ngagai kandang endur ti diempang sida.
Rekod ketegal ti enda kala bepegai ba semaya bala perintah di Sarawak ngagai orang bansa asal bekaul enggau projek tekat ti dulu ari tu endang enda manah ke kompeni nya.
Lalu pengerindu Sjotveit mansutka penerang media dalam suratberita ngena intonasyen ti kering, nulis dalam blig lalu nguji ngayanka pemanah diri empu nya enda ulih nyemekih asil pansik beforensik ti dipejalaika universiti-universiti tebilang di dunya lalu udah mujur meda projek tekat besai-besai ti dipelanja beribu-ribu jutadollar nya nadai ngembuan pelasar endur berindik ti tegap.
Peranak menua Norway nya nadai beniat deka diau lama agi di menua Sarawak nyentuk ke ujung taun tu ngemataka penembu projek, mar bendar iya deka ngenegapka agi talat penemu iya.
Ke bendar iya menua Sarawak udah puntan mantaika asil pansik empas projek ba rampa menua enggau mensia (EIA) ke semua projek tekat ti besai-besai ti dipejalaika SEB lalu semua projek nya endang seruran ngelanggar atur ari ti majakka projek nya dikereja nyentuk ke tembu.
Sjotveit empu udah ngelanggar atur nentuka stindit Gerempung Kuasa Hidro Entarabansa (IHA), ti endur iya empu nyadi kaban dalam komiti besai dalam gerempung nya.
Bala orang ti tentu deka bulih penguntung ari program SCORE nya Gabenor Taib Mahmud enggau raban kroni iya empu.
Duit ti diinjau lalu ti dibayar ngena wang turu menua ba penyampau ti mayuh bendar ti diberi nengah kontrak ngagai kompeni-kompeni sida Taib sebilik, ti udah megai syer pemadu mayuh dalam semua pengawa dagang kunsi dalam SCORE.
Sekali ke projek nya deka mai penguntung ti bendar ngagai orang mayuh tauka enda, SCORE endang ditemu deka mai penguntung beribu juta ringgit ngagai tuai bediktator Sarawak, ti endang nyadi pemegai syer pemadu besai dalam projek nya.
Berebak enggau nya, mulia ti ditinggalka Taib ke menua Sarawak nya sekali agi udah ditekanka NASA ba sebengkah repot sida ti baru nya nunjukka ikas pengerusak rampa kampung di Malaysia udah niki ngagai 150% ba taun nyin kemari aja, ba pengawa Taib enggau bala kroni iya ngulihka teda tauka laluh kayu kampung ti agi tinggal ari kampung Sarawak, ti kala nyadika kampung bungas pemadu tuai sereta manah di dunya tu.
