Diatu BN udah muai Taib lalu sida mega patut muai undang-undang ti udah digaga iya dikena ngemendarka pengawa ngerampas tanah ti enda besenutuk enggau konstitusyen menua mega.

Kepala Menteri ti udah badu nya udah ngemendarka bebarapa siti ubah Undang-undang Tanah Sarawak nyadika sebengkah chara iya ngulihka tanah pesaka raban orang bansa asal.

Siti ari ubah undang-undang nya dikemendarka iya dalam bulan Lima 2000 suba dikena iya ngerampas kuasa orang bansa asal atas tanah pulau galau enggau pemakai menua sida.

Keruga ti baka tu udah ditemu Kot Perintah Besai nyadika sebengkah penyalah ti ngelanggar konstitusyen menua.
Baka ti udah diterangka nengah surat-surat penerang ari Opis Tanah enggau Survei ti dibantaika Sarawak Report, sebengkah kandang menua ti besai bendar rampa dirampas enggau chara enda beradat udah diberika ngagai sida Taib sebilik tauka ngagai bala kroni politik enggau dagang iya (ti dikarapka iya deka meri duit suap ti mayuh).

Diatu kitai patut meratika siti kes ti baru ti dipecharaka ba minggu tu dalam Kot Apil dikena ngelaban Perintah Sarawak ti bekaul enggau tanah enggi raban bansa Iban ari pelilih Sebangan.

Laman blog Sarawak Report tu mih ke terubah udah nyungkit pengawa ngerampas tanah ngambika dikelala orang mayuh, lebuh dalam taun 2010 suba kami nuliska repot ari pelilih menua nya lalu mantaika adi Taib, Raziah Mahmud, nya endang bisi tanggungpengawa nyadi siku direktor enggau pemegai syer pemadu besai dalam kompeni Quality Concrete.

Baka selama, Raziah ngena kuasa penuduk direktor iya dalam kompeni enggau mega pemayuh syer kompeni ti dipegai iya dalam Quality Concrete ti beduduk ba kaul iya ti nyadika menyadi kepala menteri iya ulih sepeneka ati salah guna enggau lisin ti ulih sida Opis Tanah enggau opis LCDA, dua iti opis tu ti dikuasa Taib.

Bala tukang tumbang ti udah betebangka laluh kayu batang ba kampung bungas ti ngena lisin ‘sementara’ ti diulih sida dikena muka kebun dandang besai sawit.
Lebuh orang ti bempu kampung nya angkat mantah, Raziah semina nyurungka RM250 ke suah ruang bilik orang diri sebilik laban udah nyerahka tanah pesaka ti patut dikembuan raban anak enggau uchu sida.

Lebuh Sarawak Report nemuai ngagai endur nya, kami diterangka nadai utai ulih dikereja laban ba endur bukai pan agi mayuh kes charut tanah di serata menua Sarawak nya lalu bisi bebalut enggau orang ti megai kuasa menua.

Tang orang bansa asal di menua nya enda mudah dikeduan agi. Betuaika Numpang Suntai (iya nya menyadi pemacha berita dalam Radio Free Sarawak, Christina Suntai) enggau beberapa iku tuai raban ti liat ati, sida udah mai kes sida nya ngaga kot lalu minta pengawa ngulihka kayu batang ari kampung sida nya diketuka.

Belabuh ari penyarut nya dia raban apek bayat lalu dikena napi orang bansa asal ti angkat mantah laban ngetanka tanah pesaka sida ari kena keruga.

Sebengkah penusah angus ti nyelai udah dipunka dalam kem kayu batang lalu raban polis udah enggau jampat ngesah nitihka repot bala pengereja pengawa dalam kem ti lalu nekanka Numpang Suntai enggau bala bakih iya nya mih ti betanggungpengawa.

Pemesai Eksekutif Shell ti udah badu gawa nya, enggau petunggal iya kepala NGO Nicholas Mujah enggau tiga iku tuai raban bansa sida udah ditangkap polis lalu dipasukka dalam rumah pasung. Tang sida udah chukup bidik laban ulih ngelempaika penanggul sida ba lawyer kuasa tanah NCR, Baru Bian, lalu tuduh dikena kompeni ngelaban sida nya udah dibuai kot.

Tang agi mayuh raban bansa ti bukai ti kena keduan ketegal deka ngetanka tanah pesaka sida empu di Sarawak lalu sida berasai enda bidik laban kena perintah atur apek bayat betuaika Taib Mahmud.

Baru Bian udah ngirit kompeni Quality Concrete enggau Perintah Menua Sarawak ngagai kot, ba sebengkah kes ti dikumbai sebengkah kes ke terubah dikereja kompeni nya, lalu kompeni nya udah alah ba Kot Tinggi ti ngujungka orang bansa asal menua nya menang ba pechara nya!

Enda lama udah bekau nya kami ditusuika Raziah udah ninggalka komiti bala direktor kompeni Quality Concrete, taja pan udah nya iya mengkang ngena rumah kompeni nya di Kuching dikena iya nyimpan opis kompeni-kompeni ti berampaska tanah.

Tang kelimpah ari ti nerima pengalah nya, Perintah Sarawak (maya nya betuaika Taib) udah nganjung apil ngagai Kot Apil, laban iya udah suah bendar dialahka ngena Undang-undang Tanah Sarawak.

Lalu enggau lapan iti kes ke dulu ti sebaka, lebuh kes ti udah dibalut skandal udah diperesa kot, kot mutuska pemenang nya ba raban orang bansa asal ti kena keduan.

Bejarit bendar Kot Apil enggau Kot Tinggi udah mutuska penyalah ngerampas tanah ba undang-undang tanah Sarawak ti sudah diubah-ubah nya salah ba konstitusyen menua bekaul enggau kuasa pengelantang enggau kuasa NCR di Sarawak.

Tang Taib ti tuai nya mengkang bingking lalu majak nganjung apil iya ngambika ngelubahka maya, awakka bisi endur kompeni-kompeni kroni iya ngereja pengawa ba tanah ti dirampas sida nya ari orang bansa asal Sarawak.

Lebuh sesebengkah undang-undang nya enda besabi enggau konstitusyen menua, Perintah Menua bisi tanggungpengawa ngubah iya, awakka iya besenutuk enggau konstitusyen lalu awakka iya enda agi ngemendarka keruga ti salah.

Taib Mahmud endang bisi belajarka undang-undang lalu iya mega seruran ngumbai diri kering penemu, lalu enda mudah surut.

Tang orang ti nganti iya diatu, Adenan satem, udah ngayanka diri nya ukai anak patung Gabenor baru nya, tang ba pekara tu iya patut kering penemu dikena iya mantaika buah runding iya.

Taib diatu berasai takut ke peluang dikena berampaska mayuh agi tanah nya deka lenyau lalu mega irau ke diri lenyau kuasa politik lebuh deka meri tanah ngagai sida sebilik tauka bala bakih politik iya.

Penanggul tentu deka nyadi ti endur bala orang bansa asal ti udah dikeduan patut dibayar pampas ti besai lalu tanah sida ti udah dijual ngagai orang bukai deka diberi pulai ngagai sida lalu kompeni ti udah buya diberi tanah nya suba tentu patut mega dibayar pampas!

Sesebengkah perintah menua patut bejalaika atur pengawa enggau betul lebuh iya udah ditemu ngereja pengawa ti salah.

Lalu enggau chara meri pulai tanah nya ngagai orang ti endang beempu, perintah menua deka meri pemanah ke rayat iya, ti endur pengelantang sida nya patut diintu, tang ukai ngintu pengelantang sida Taib sebilik tauka pengelantang bala kroni iya.

Bala orang ti deka beranakka puku dagang patut bejimat. Sebarang kompeni ti deka meli asik kayu batang tauka minyak sawit dalam sebuah menua ti dikuasa perintah apek bayat baka menua Sarawak patut ngadang napi sebarang jaku tangkan.

Enti kayu batang tauka tanah ti udah diulihka sida dikereja sida maya Taib nyadi kepala menteri suba, belabuh ari diatu sida deka meli atas risiko ditanggung sida empu.

Bala orang ti deka beranakka puku nya tentu enda ulih agi ngaku enda salah!