Sebengkah kontrak pengawa ngaga rumah ti besai bendar ungkus udah diberi Taib Mahmud ngagai kompeni-kompeni enggi sida sebilik ba minggu ke penudi iya mangku pengawa Kepala Menteri suba.
Kontrak ‘ti diperundingka’ nya nadai ngena atur tender tebuka ti dikena iya nentuka kontrak nya diberi terus ngagai iya empu aja.
Asil ari nya, rampa tebing sungai Sarawak di nengeri Kuching deka ubah nyadi rampa nyerupa pengeraja menua Arab, dati ari penemu Liberace ti nyual piano emas iya ngagai Taib.
Taib Mahmud endang deka bulih penguntung ari kontrak ti benung dipejalaika nya.
Kandang tanah ti dikemansangka nya udah diambi ari bala orang di menua nya ba rega ti mimit bendar lalu projek nya dipelanja ngena wang turu menua ti udah dipasukka ke dalam ‘dagang kunsi’ enggau kompeni SEDC.
Projek dagang kunsi nya dikena nentuka ungkus nya dipelanja ngena wang turu menua, lalu untung ari pengawa nya deka dipasukka dalam kontraktor sida Taib sebilik, baka CMS, Naim Candera enggau PPES
Enggau projek ngaga jematan emas meraka sungai Sarawak nya (digaga kontraktor baka PPES/Naim Candera) nuju rumah Dewan Undangan Negeri ti baru.
Tang kontrak ti besai-besai ditanggam beberapa bulan ke udah nya ngaga rumah tinggi begembar ba atas kandang Kuching Itmus.
Rumah tinggi dua buah nya deka endur engkahka opis ti besai bendar reti ba Taib di menua nya.
Sebuah rumah tinggi nya deka endur LCDA, iya nya sebengkah agensi ti ditubuhka dikena iya ngulihka tanah asal orang bansa asal di Sarawak.
Sebuah agi rumah tinggi deka endur engkahka SEDC, sebengkah agensi beranakka puku ti dikena melanja mayuh dagang kunsi enggi sida sebilik, baka resot temuai di Mulu.
SEDC mega ‘bakih dagang’ kompeni CMS tin gaga opis baru iya!
Tiap iti opis perintah nya udah diserahka ngagai CMS ba rega RM76 juta – kedua-dua nya beungkus RM150 juta ke kompeni sida Taib sebilik.
Projek nya udah dipejadi ba bulan Lapan nyin kemari lalu dikemataka CEO CMS bebansa British, Richard Curtis.
Projek berumah nya semina siti ari rintai kontrak ti udah diserahka orang tuai ti rangka nya ngagai kompeni sida sebilik enggau enda ngena atur tender besemekih. Dikena melanja program SCORE iya nyadi Menteri Pekara Belanja undah ngagihka setengah ari bajet menua dikena melanja duit injau dikena nyukung bebilion-bilion ringgit ungkus kontrak ti besai-besai, tebal agi nya nengah kompeni-kompeni sida sebilik.
Diatu iya udah nyadi Gabenor, tang lalu nadai kelai langgur ‘pemansang ekonomi’ di menua iya deka diubah.
Duit ti diinjau ngena bajet menua Sarawak, ti udah ngelui ari duit agih ti patut dikena melanja sekula, sepital, diatu dikena melanja projek dalam pelilih SCORE enggau pengawa begagaka gajah burak, baka rumah opis perintah tu.
Aruh iya ga suratberita nusui pasal pengawa dagang kompeni-kompeni ti tentu deka bulih untung dalam SCORE – ari tujuh buah kompeni munyi ti ditusui Borneo Post, semua nya enggi Taib enggau bala kroni dagang iya magang.
Ba gigi tangga pengabis atas dalam rintai nya CMS ti bepengerusika anak Taib empu.
Udah nya Naim Candera, bepengerusika petunggal iya enggau mega nomini iya, Hamed Sepawi.
Bank Kenanga Investment patut nemu, laban setengah ari bank nya endang enggi CMS ti enggi Taib!
Sama bisi dalam rintai nama kompeni nya Ta Ann, ti mega bepengerusika Hamed Sepawi; KKB Engineering, ti 20% ari nya diempu CMS.
Sida Taib sebilik deka ngulihka untung bebilion-bilion di Sarawak, lalu bala orang selama baka bala pengayuh sampan ti bepanggai ba anak tambang bala penumpang ti deka meraka sungai agi betanya-tanya nama penguntung sida ari dagang nengali ti dikereja sida Taib sebilik?
