Seraban kompeni ari menua tasik, ti tebal agi udah madahka ngagai bala pelanggan sida madahka asil kayu sida nya ‘asil ti meruan’ sehari tu udah ditangkan jaku ambu sida pasal asil kayu sida nya enda ulih dikamatka lalu mega madahka pengeluar asil kayu sida, Gerempung Kompeni Roundtree enggi sida KTS sebilik diatu udah dikaitka enggau mayuh bengkah repot bekaul enggau pengawa ngulihka kayu batang chara belalai.
Sarawak Report udah bisi bulih salin beberapa bengkah repot polis ti digaga dikena ngelaban kompeni Isotimber Sdn Bhd ti bisi kaul enggau KTS.
Isotimber udah nebang lalu ngenchuri kayu batang ari kampung orang bansa asal di pelilih menua Julau di Sarawak enggau nadai pemendar ari sapa-sapa.
Berebak enggau nya mega, Sarawak Report bisi bulih siti salin sempekat ti udah ditanggam enggau chara belalai entara kompeni Isotimber enggau dua iku orang di menua nya ti udah ngelepaska asil ari kampung NCR di Julau ngambika ditebang, nyengkaum sebuah kar menua ti nunjukka kandang kampung ti ditebang Isotimber.
Repot polis nya madahka Thomas enggau beberapa iku orang di menua nya nyengkaum siku Tuai Rumah bisi udah ngabas kampung sida di Sungai Kemuing, Ulu Lijan di Julau kena 30hb Januari 2014 lalu tetemuka kampung sida ari Sungai Sebuluh, Sungai Sebo, Sungai Sebayak enggau Sungai Sekerangan udah ditebang lalu dichuri kompeni Isotimber.
Repot nya madahka 40,000 kayu batang udah ditugungka ba siti endur lalu sida bisi tetemuka sebengkah sempekat udah ditanggam entara kompeni Isotimber enggau dua iku orang diri menyadi ari menua nya empu, Kasi Anak Janda enggau Bartholomew Busah Anak Janda, enggau nadai pemendar ari orang di menua nya empu.
Udah penyarut nya ditemu bisi nyadi entara orang ti bempu tanah NCR enggau pengari ari kompeni nya, nya baru orang di menua nya nemu bisi sempekat kala ditanggam.
Asil pansik Sarawak Report madahka Bartholomew Busah Anak Janda nya siku Supervisor ti bekereja ba Opis Kampung Sarawak.
Lalu menyadi iya, Kasi Anak Janda nya siku pengajar ari menua nya empu. Bisi siti penanggul besai bekaul enggau komitmen di atas nya tadi, nitihka jaku ari bala tuai di menua nya empu, ti madahka dua iku orang diri menyadi nya nadai kuasa tau ngemendarka kampung sida nya dilepaska ngagai sebarang orang tauka sebarang kompeni baka nya aja.
Repot polis ti digaga kena 11hb Empat 2014 nyin kemari, nerangka enggau silik baka ni bala orang di menua nya tetemuka kayu sida udah ditebang orang enggau chara belalai lalu ditabanka Isotimber.
Repot nya madahka bisi 568 batang kayu ditinggalka orang ba endur nya tang sida enda nemu ni pemayuh kayu ti udah diambi orang.
Nitihka pansik Sarawak Report, kompeni Isotimber nya dikemataka siku pengarah benama John Lau Hui Sing, siku ari sida KTS sebilik, lalu iya mega nyadika pengarah enggau pemegai syer dalam mayuh agi kompeni KTS ti bukai.
KTS nya sebuah ari kompeni kroni kayu batang di sarawak lalu mega nyadika kompeni ti bejualka asil kayu batang entarabansa ari menua Sarawak.
Pemegai syer pemadu besai dalam Isotimber nya benama Roundtree Group Sdn Bhd.
Kompeni Roundtree Group nya udah ngelakuka dagang sida dalam laman web sida ngambu diri nyadi penengkebang dagang kayu ramu Sarawak, nyengkaum dagang pengawa nebang kayu, palan pengaga asil kayu batang, papanlapis, kebun bedandang besai enggau pengawa pengangkut ngena pejalai kapal, lalu bisi pengereja pengawa manggai 10,000 iku.
Kompeni Roundtree kala udah dibari bechara dalam kot di menua Sarawak laban dituduh nebang sereta ngenchuri kayu batang ari kampung enggi orang bansa asal.
Ambi ke banding, ba pun taun 2006 nyin kemari, bala orang asal ari pelilih Sebangan udah tetemuka kompeni Roundtree Timber udah ngaga rel keritapi sida ngerenchah kampung asal sida ti udah ngujungka pengerusak ba rampa menua sida sereta pengelenyau kayu batang sida, lalu dalam taun 2011, orang bansa asal ari menua Sri Aman nya udah mai kes nya ngagai kot ngelaban Roundtree Timber laban ngeruga tanah NCR sida lalu ke pengujung iya sida menang.
Nitihka penerang dalam laman web sida, Roundtree Group nya datai ari raban KTS sebilik: John Lau Hui Siew, Peter Lau Hui Sing enggau Robert Lau Hui Yew.
Nitihka asil pansik ba kompeni kompeni sida KTS sebilik nya sida mega bisi mayuh sher dalam Roundtree Group nengah mayuh kompeni.
Tu nyadika amal sida ti ngelama tu ti endur bala tauke kayu batang Sarawak rindu agi ngelalaika pegai sher sida dalam mayuh bengkah kompeni bekerubung.
Roundtree empu madahka asil kayu sida nya dijual ngagai lebih 30 buah menua di menua tasik, baka menua Jipun, Amerika, Eropa, China, India enggau sekeda menua di pelilih Asia. Kelimpah ari nya sida mega nyual asil kayu sida ke menua Australia, Kanada enggau Amerika Syarikat.
Di menua Australia sida bisi numbuhka kompeni ti benama RT Group Timber Australia.
Pengawa dagang RT Group Australia nya mai kami ngagai sebengkah agi kompeni ti berejista di Australia. Raban pengarah enggau pemegai sher sida nya Ting Siew King (ti mega nyadi pengarah dalam Roundtree Group) enggau Nicholas Cheang Weng Hoe.
Sarawak Report mega tetemuka sebuah agi kompeni enggi Roundtree (iya nya Roundtree Timber & Lattice Pty Ltd) di menua Australia ti udah direjista lalu bejalaika pengawa ari opis ti sama.
Bala pengarah sida nyengkaum King Siew Ting enggau pemegai sher dalam Roundtree baka Juliet Chuih-Tiek Lau, Ken Kai Chui Ting enggau mega Ting & Lau Property Pty Ltd. Bala pemegai sher dalam Ting & Lau Property nya pengarah Roundtree King Siew Ting enggau Lau diri menyadi dalam KTS.
Asil pansik Sarawak Report ngayanka Roundtree Timber enggau Lattice Pty Ltd nyadung asil kayu ngagai kompeni bukai baka Sekit International enggau ngagai Lattice Makers Victoria.
Di menua Kanada, kompeni PH Venture nyadika pelasar sida dikena meli asil kayu ari Roundtree Timber enggau Perfect Trans ari Malaysia, enggau mega Woodywood Industries, ti bisi palan ngeluarka asil kayu di pelilih Paramaribo di menua Suriname, Amerika Selatan.
Woodywood Industries N.V bisi dtemu ngangkut asil kayu sida ke menua Amerika nengah kompeni ari menua China enggau Singapura.
Di Amerika Syarikat mayuh kompeni ti bekaul enggau kompeni Roundtree tu meli kayu terus ari Roundtree Timber di Sarawak.
Kompeni Wood Brokerage International kala didinga muji diri empu nyadika kompeni ti bejalaika atur ngulihka kayu meruan tang rekod pengangkut kayu sida semina nunjukka sida meli kayu ari KTS sebilik dalam bulan Tujuh 2014 tu tadi.
