Udah tembu pengeraami nyambut hari jadi iya, Taib Mahmud lalu mansutka jaku gerah pasal langgur iya ti deka ngaga sebuah rumah muzium ti ditagaka dikena mandangka semua leman cherita lama ti bekaul enggau iya empu.
Agi mega Taib udah nyadi menteri sengelama 50 taun udah menua tu merintah diri, lalu 33 taun ari pengelama nya iya nyadi Kepala Menteri.
Dulu ari iya, nya menyadi indai iya empu.
Enggau nya, sapa agi ti patut agi bulih kontrak ngaga rumah muzium menua ti berega RM150 juta ti deka digaga ari besi aluminum enggau kaca, kelimpah ari kompeni enggi sida Taib sebilik, Naim Candera?
Enggau chara tu, orang tuai rangai nya deka bulih mayuh agi penguntung enggau chara muji diri empu.
Nyerupa sigi telu ‘orang lelaki’ ti dilanggurka nya dikena mandangka penyumbung Taib, ti deka digaga ba tengah-tengah tebing sungai ti puang, enggau nadai bekau cherita lama ngelingi iya.
Tang, Taib endang deka majak ngaga rumah ti nyerupa rumah orang kaya.
Rega rumah nya patut mar rega nya – tambah mega iya empu ti deka dibayar nyadika upah iya ngaga rumah nya!
Rumah muzium ti baru nya deka didirika berimbai enggau pendiau ofisyel iya, Astana, ti disadang ulih endur iya nyenguk-nyenguk cherita lama iya empu ti dipandangka dia ila.
Bala orang mayuh di nengeri Kuching semina nemu pasal tanggam sempekat ngaga rumah nya ba minggu nyin kemari.
Orang mayuh endang enda ulih bejakuka sebarang pekara bekaul enggau isu nya laban tapak rumah ti bechura pirak burak nya digaga berimbai enggau rumah DUN ti baru ti bechura kuning emas, ti udah digaga ngena duit agih ti besai agi, ulih kompeni enggi Taib empu, CMSB.
Ke bendar iya, bala pemeri penerang ari dalam bisi udah madahka ngagai Sarawak Report pasal selampur projek nya datai ari buah runding sekeda bala orang dalam kompeni Naim Candera empu, ti betuaika petunggal enggau nomini Taib empu, iya nya Abdul Hamed Sepawi.
Ba renggat ke terubah, buah runding nya ditagaka nyadi ‘Projek Tanggungpengawa Sosial Korporat’, ti betuju asal iya dikena nyimpan cherita lama ke orang Sarawak ngena wang turu ari orang Sarawak empu.
Tang, perintah menua ti betuaika Taib empu enggau mega adi ipar iya empu Adenan Satem, nuduhka penemu ngasuh projek nya dipejalaika Naim Candera ngena belanja ti besai bendar.
Nya kebuah, enti sebarang kompeni bukai ti dipejalaika Taib bisi sebarang buah penemu dikena ngena pemanah cherita pasal Taib sereta dikena masa iya, sida patut ngenataika penemu sida diatu, ngambika sida tau bulih duit agih dikena sida belabuh bekereja.
Isu ti udah ngujungka orang mayuh di nengeri Kuching mansutka jaku tanya nama “pemeri” ti datai ari lubuk ati sida Taib tu sebilik?
Tambah mega Taib enggau sida sebilik udah ngena penuduk tinggi iya dalam perintah menua nugungka pengeraja ke sida sebilik aja.
Munyi penerangt ti dikeluarka menantu iya empu, nadai orang pemadu kaya bap dunyai tu kelimpah ari Taib Mahmud.
Baka ni gaya pemeri ti dikena ngayanka pendiau iya ti udah balat bendar bebasauka pengeraja asil tanah di menua Sarawak?
Selampur kampung ti manah bendar rampa sereta ngembuan rega tinggi dalam penemu saintifik udah dibasau baka nya aja, lalu nadai berundingka sebartang atur pengawa deka ngalau sebarang utai tumbuh tauka utai tumbuh, tang semina meri awak ngagai Taib ngulihka penguntung ari pengawa nebang enggau nyual kayu batang.
Baka nya mega, tanah enggi orang bansa asal udah mayuh bendar dirampas, kampung ditebang lalu dibuka nyadika kebun dandang besai, mai penanggul ti ngenusah orang bansa asal, awakka meri awak ke Taib ngulihka penguntung ari semua utai di endur nya.
Diatu mayuh sungai udah diempang lalu dirusak, awakka meri jalai ke Taib majak ngulihka penguntung, lalu diseretaka pengawa begagaka tekat besai-besai lalu ngeregaska agi projek ngeluarka barang ngena kontrak ari perintah menua ti betuaika iya empu.
Rintai pengawa nya majak nambah-menambah, tang nama reti ti bendar ‘pemeri’ ari sida Taib sebilik enggau atur tuai betikas kroni Sarawak?
Ke bendar iya, tiap iku orang di menua Sarawak endang nemu bendar kini penunga pemeri sida, dikena melanja Taib ngemenuhka pengingin ati iya. Rayat Sarawak ke bendar iya orang ti udah lenyau semua utai.
Lebuh mansutka pasal projek ngaga rumah muzium nya ba minggu nyin kemari dia Menteri William Mawan Ikom madahka terima kasih ke “pemansang” maya menua betuaika Taib, dia upah enggau gaji di menua Sarawak dalam pengelama 50 taun, sama bela enggau penanggul inflasyen, udah niki ari RM680 ngagai RM40,000 diatu, iya nya ngagai RM3,333 sebulan.
Lumur nya manah bendar didinga, enggau penyampau pampas ti dibayar kompeni Sarawak Energy ti dikemata perintah ngagai raban bansa Penan ti udah dituntung mayuh penanggul, udah bekau sida diburu pansut ari menua asal sida ketegal meri awal ke projek tekat Murum semina nerima RM250 sebulan, sama enggau pakej pemakai rangklai ke pengelama 4 taun aja.
Kelimpah ari nya sida Taib sebilik udah mujur ngulihka bebilion-bilion ringgit ari Murum enggau tekat ai ti bukai, nengah pengawa dagang simen ti ditengali sida; pengawa masang tali kuasa karan nengali, ngagai kandang menua pengeluar barang enggi sida empu lalu ngerampas lisin enggau kontrak ti besai-besai.
Enggau nya, sapa ti bendar udah ngeluarka pemeri dikena ‘ngemansangka’ menua Sarawak, tang nama pemeri ari raban bansa Penan enggau raban bansa asal ti bukai ti deka diayanka dalam rumah muzium nya ila, ti endur penyeranta sida udah pulaika pengeraja ti tau bendar meri malu ngagai Taib enggau sida sebilik.