Ba ujung minggu tu tadi raban lawyer ti bekereja ke Sarawak Report udah ngirumka sepuchuk surat nengah emel ngagai kompeni “pengelikun saiber” ti diupah PetroSaudi International (PSI) lalu nyebut baru jaku dalam repot berita New Straits Times.
Bala lawyer SR nya minta dikamatka ba penerang-penerang ti ditujuka ngagai sida dalam dua buah artikel ti ditusui New Straits Times, nengah repot ‘nyemetak’ sida bekaul enggau atur nangkap Xavier Justo di menua Thailand.
Diatu kami ngeluarka isi surat nya ti agi nganti saut ti nyadika pun prosiding-prosiding ti nangkanka tu:
Surat ari Reed Smith LLP, London
Tabi ke kita,
Kami bekereja ke Clare Rewcastle-Brown, baka ti dikelala kita nya, siku pengarang berita ti bejalaika pengawa mansik lalu mega nyadika orang ti mungkal laman blog Sarawak Report.
Kami nuliska surat tu ngagai kita bekaul enggau dua iti artikel ti bisi dikeluarka dalam portal berita internet New Straits Times Online ti tau digusung nengah pemaut-pemaut tu:
Thai police nab PetroSaudi ex-staff over attempted extortion :www.nst.com.my/node/89480
Who is Xavier Andre Justo: www.nst.com.my/node/89623
Genteran jaku tu dikeluarka dalam artikel NST ti keterubah:
Sebuah kompeni pengelikun saiber, Protection Group Internationa (PGI), udah diupah bejalaika pengawa mansik ba pun penatai data ti kala diayanka ba internet lalu mega ngamatka penulin data nya.
Pansik-pansik nya ngayanka penerang ti tampak bendar ba penyalah ngenchuri data resia kompeni ti dikereja Justo sebedau iya ninggalka kompeni PetroSaudi. Tambah mega, asil pansik kami tetemuka data ti dicuri iya ari PetroSaudi nya udah dikachau sereta diubah-ubah iya.
Kami pechaya bendar ke semua data nya udah dikachau lalu diubah iya ti udah nya lalu dikeluarka dalam Sarawak Report lalu nyadika pelasar jaku tuduh ti enda betul dikena ngelaban 1MDB.
Siku pakar ari PGI madahka:
“Pansik kami benung chakah dipejalaika, tang terang bendar kami meratika kes tu nyadika kes enchuri data ba rampa ti besai bendar, lalu asil pansik kami besetujuka Justo nya nyadika pun data ti dikeluarka dalam Sarawak Report.
“Ambi ke banding, lebuh kami meratika dalam fail PowerPoint ti dikeluarka dala siti ari entri blog Sarawak Report, kami bisi tetemuka penerang ba metadata fail nya ti endur fail nya udah kala dikereja siku orang ti ngena nama “xavierj” dalam taun 2013; dua taun udah bekau Justo ninggalka PetroSaudi, lalu udah bekau empat iti fail nya digaga sebengkah kompeni lawyer ti nyanding penemu ngagai PetroSaudi.
“Nya mega terang bendar nunjukka data ti udah dichuri nya nyadika set penerang ti enda genap, lalu udah kala dikeruga udah iya dibai pansut ari sistem PetroSaudi, lalu mega sebedau iya dikeluarka dalam internet. Mayuh bendar data ti enda besabi entara data ti dikeluarka enggau fail ti agi mengkang ba PetroSaudi dalam kandang maya nya. Disimpulka ngena jaku pandak, data nya enda genap, udah dipilih-pilih sechara kreatif lalu dibali-bali nitihka peneka gaya nempa cherita.
“Ke semua kes tu udah suah bendar dipeda kami; ti endur siku pengereja pengawa ti rangka udah madamka data lalu ngemba deka ngeluarka data nya ngambika ditemu orang mayuh tauka udah ngeluarka data nya ke penguntung diri empu – ari segi belanja tauka utai bukai. Data ti dikeluarka nya udah dibali sechara bepilih-pilih dikena nempa cherita ti deka mai pengerusak ti balat.
“PetroSaudi, sebaka mega enggau kompeni-kompeni bulai, orang siku-siku tauka perinta ti kala dipeda kami, deka dituntung penusah ketegal kena chiping sereta diserang orang ti kurang bepenemu nengah internet. Ba kes tu, iya bepun ari siku pengereja pengawa ti deka ngulihka penguntung ke diri empu, udah ngerembai nyadi jaku tuduh ti bisi tuju politik nengah sekeda blog ti enda betanggungpengawa.
“Semua pansik ti udah dipejalaika kami tu ngujungka aku tau madahka, ari sukut forensik enggau pengelandik kami, penerang [bekaul enggau isu tu] ti udah dikeluarka dalam internet patut digaga nyadi enda likunagi lalu enda tau dikarapka sapa-sapa ti deka ngaga simpul penemu ari nya,” katanya …
Nyerumba nya, PGI madahka sida deka nyerahka penerang ngagai raban orang ti bekuasa lebuh sida benung begigaka saut baka ni fail dalam komputer PetroSaudi nya ulih dibuka, diperesa lali diubah.
Baka nya mega, artikel ti kedua bisi nyebut:
PGI mega ngamatka semua dokumen dalam laman web Sarawak Report udah kala dikachau, diubah sereta dibali sechara kreatif.
Minta bala kita ngamatka penerang dalam saut kita:
- sekali ke genteran jaku ti dichura mirah nya engkeman lalu genteran jaku nya enda diubah diberika ngagai siku ari raban pengereja pengawa kita; enti enda, minta kita ngamatka ni bagi genteran jaku ti enda engkeman lalu/tauka udah diubah lalu beri penerang ti silik bekaul enggau teks ti udah dipadamkan;
- gaya pengelala diri “pakar ari PGI” ti udah meri tibak cherita ti ditunjukka nya enti tibak cherita nya udah diberi; lalu
- sekali ke kita ngumbai leka jaku di atas nya ti bechura biru nya nyadika simpul asil pansik ti engkeman; tang enti enda, minta kita ngamatka enggau engkeman pekara nya enda engkeman.
Aku ti bendar,
Reed Smith LLP