Enti perintah enggau atur perintah nya kelalu tampak enggau tebuka, perintah deka dipeda ‘telanjai’, lalu pengawa nya sebaka enggau pengawa ngemesaika pengawa kamah, pia ku Menteri dalam Opis Menteri Besai ti diberi tanggungpengawa ngemataka integriti, Paul Low …
“Nama kebuah aku madahka nya sebaka enggau pengawa kamah, laban semua atur perintah nya (ayan sereta tampak magang),” ku Low bejaku ba sebengkah forum di KL.
Pekara pasal tebuka enggau tampak nya sekali ke raban bansa ulih nerima lalu enda nyampurka enggau politik.
“Batang pekara nya, ni penyampau nya tebuka tauka tampak? Baka ni pemayuh orang ti ulih nerima chara ti tebuka sereta tampak enggau pendiau ti betanggungpengawa? Lalu enda mutar-melitka sebarang pekara, enda nuduh sengapa, lalu enda lunggar penemu?
“Perintah deka mansutka jaku tanya pasal atur ti tebuka sereta tampak,” ku Low seraya nambah iya mega besetuju enggau penampak sereta tebuka.
Paul Low nya kala bekereja ke Transparency International, iya nya sebuah NGO ti meransang perintah bejalaika atur pengawa enggau tampak sereta tebuka.
Diatu iya bekereja ke Najib, nya kebuah iya ngubah lagu iya lalu ngutuk atur perintah ti tebuka sereta kelalu tampak – terang bendar iya ngembuan pendiau bedalih-dalih sereta enda tegap penemu.
Najib, sehari tu udah ngumbai semua orang ti mantah penyalah makai suap nya “munsuh orang Islam”, lalu Paul Low madahka peminta orang mayuh ba penampak sereta deka nemu pasal pengelenyau bebillion-billion dollar nya “pengawa kamah”.
Penemu ti baka tu disadang tau meri jaku arah ngagai semua rumah mesjid ngambika nuduh Sarawak Report nya ngembuan pendiau Islamafobia (begedika Islam) lalu ngemesaika pendiau ti kamah.